Staðfest er að næsta sumar gefst íslenskum ferðalöngum loks tækifæri til að fljúga beint frá Íslandi til annarra áfangastaða en Alicante og Barcelona en það hafa verið einu staðirnir á Spáni undanfarin ár sem Icelandair og Iceland Express hafa flogið nokkuð reglulega til.
En nú hefur Primera Air, í eigu Andra Más Ingólfssonar sem einnig á Heimsferðir, staðfest að flugfélagið muni hefja beint áætlunarflug frá Íslandi til Tenerife og Malaga á Spáni og Billund í Danmörku frá næsta sumri.
Eru þetta hinar bestu fréttir því flugfélagið segir í tilkynningu að þó samningar séu við ferðaskrifstofuna Heimsferðir, mjög óvænt, um að flytja farþega þeirra verða líka í boði flugsæti fyrir aðra til þessara þriggja staða.
Virðast margir aðilar sjá sóknarfæri í flugi hérlendis því varla er þverfótað fyrir fregnum af nýjum flugfélögum á næsta ári. Eitt flugfélag er staðfest og annað á hugmyndastigi. Þá skýrir DV frá því að lágfargjaldaflugfélagið easyJet hyggist hefja flug hingað næsta sumar en Fararheill.is hefur ekki fengið það staðfest frá flugfélaginu sjálfu.
Ef allt gengur fer því úrvalstíð í hönd fyrir íslenska ferðalanga með samkeppni og alles.
