Það er ekki oft sem strandgestir við Miðjarðarhafið þurfa að óttast hákarla en ástæða þótti til að gefa hákarlaviðvörun á St.Tropez á frönsku rivíerunni um helgina eftir að hákarl eða hákarlar sáust nokkrum sinnum á sveimi undan ströndinni.
Kom ekki til þess að ströndum væri lokað á svæðinu og hefur hákarlsins ekki orðið vart eftir helgina þó kafari hafi séð minnst einn berum augum þrívegis á laugardag og sunnudag. Gat kafarinn ekki áttað sig á tegundinni en sagði dýrið minnst tveggja metra langt.
Má eiginlega furðu sæta hversu sjaldgæfar hákarlaárásir eru í Miðjarðarhafinu miðað við þær tugi milljóna sem þar svamla meðfram velflestum ströndum öll sumur í Evrópu.
Samkvæmt sérstakri alþjóðlegri skrá sem haldin er yfir slíkar árásir á heimsvísu er aðeins vitað um 38 slíkar árásir en í þeim hafa 18 einstaklingar látið lífið.
Síðasta dauðsfallið vegna slíkrar árásar við Miðjarðarhafið varð við strönd Grikklands árið 1984.
