Iceland Express auglýsir í blöðum í dag flug til sex borga Evrópu á aðeins 15.700 krónur aðra leiðina með sköttum og gjöldum. Sem er hið allra besta mál nema fyrir þá sök að umrætt fargjald er alls ekki í boði á umræddum tíma til þriggja af þessum sex borgum.
Skömmu eftir auglýst tilboð finnast engar ferðir á auglýstu verði hjá Iceland Express
Ritstjórn hefur yfirfarið allar brottfarir Iceland Express frá Keflavík til Parísar, Barcelóna, Alicante, Kaupmannahafnar, London og Berlínar en auglýsing flugfélagsins hljóðar upp á 15.700 króna verð til þessara borga sé flogið frá 15. ágúst til loka september.
Fram er tekið að um valdar dagsetningar, takmarkað sætaframboð og valin flug að ræða en eins og Fararheill hefur áður gagnrýnt er engin leið að finna bestu verðin nema þræða hvert einasta flug félagsins. Sem er miður og óvirðing við viðskiptavini.
Ekki væri kannski fráleitt að ætla að tveimur stundum eftir að auglýsingin birtist væru líklega einhver sæti á þessu verði uppseld en að þrjár borgir af sex alls séu ekki í boði á uppgefnu tilboðsverði er langsótt mjög.
Að neðan má sjá lægsta flugkostnað aðra leiðina fyrir einn með sköttum og gjöldum til Parísar, Barcelóna og Alicante klukkan 10 þann 14. ágúst 2012 eða sama morgun og umrædd auglýsing birtist.
ALICANTE: 15.ágúst (48.700), 18.ágúst (48.700), 22.ágúst (48.700), 25.ágúst (uppselt), 29.ágúst (20.700), 1. september (44.700), 4.september (42.700), 8.september (20.700), 11.september (33.700), 15.september (40.700), 18.september (uppselt), 22.september (48.700), 25.september (uppselt), 29.september (66.800)
PARÍS: 16.ágúst (uppselt), 20.ágúst (uppselt), 23.ágúst (66.800), 26.ágúst (uppselt), 27.ágúst (46.700), 30.ágúst (44.700), 2.september (66.800), 6.september (24.700), 9.september (18.700), 13.september (24.700), 16.september (24.700), 20.september (18.700), 23.september (22.700), 27.september (uppselt), 30.september (uppselt)
BARCELÓNA: 17.ágúst (uppselt), 20.ágúst (44.700), 24.ágúst (66.800), 27.ágúst (40.700), 30.ágúst (42.700), 3.september (66.800), 7.september (48.700), 10.september (40.700), 14.september (48.700), 17.september (20.700), 21. september (32.700), 24.september (20.700), 28.september (46.700)
Umrætt tilboð, 15.700 krónur, finnst þó á flugi þennan tíma til Berlínar, London og Kaupmannahafnar.
