Út, út mín sál og það sem allra ódýrast
Fararheill hefur og mun áfram deila tilboðum sem við rekumst á, þykja freistandi og koma frá fyrirtækjum sem við annaðhvort þekkjum á eigin skinni af góðu ella frá aðilum sem hafa langa reynslu því fyrirtækin sem eilíft svindla og pretta verða oftast ekki langlíf.
TILBOÐ A:
Hluti ritstjórnar hefur oftar en einu sinni og oftar en tvisvar orðið sér úti um bílaleigubíl á Spáni gegnum bresku netbílaleiguna Mycarhire.co.uk. Sú gerir samanburð meðal allra bílaleiga á viðkomandi stað þannig að bestu verð allra verða strax ljós og ekki þarf að fletta lon og don til að finna vænlegasta verð. Við mælum samt með að lesa smáa letrið í þaula eins og alltaf því stundum hangir eitthvað á spýtu. Næstu þrjá daga eða svo býður þessi aðili sérstakan 25 prósenta haustafslátt af verði útvaldra bílaleigubíla. Það getur verið feitur sparnaður sé fólk á ferð í lengri tíma eins og allir vita sem leigt hafa bíl lengur en stundarkorn. Hlaupa til eigi síðar en á miðnætti á sunnudag.
TILBOÐ B:
Skemmtiferðasiglingar eru góð skemmtun en herlegheitin kosta sitt. Því er ráð að heimsækja Vacationstogo.com en sá vefur fylgist tryggilega með öllum helstu tilboðum og afsláttum hjá öllum helstu skemmtiferðaskipafélögum heims og lætur vita. Nú er útsölutími hjá öllum þeim helstu á ferðum fram að næstu jólum og afslættir því algengari en ella og verðfall verulegt á siglingum sem verst hefur gengið að selja í. Fólk verður þó að skrá sig á vef þeirra til að fá aðgang að tilboðunum en það er lítið ómak ef spara má tugþúsundir í staðinn. Bestu tilboðin þó aðeins í boði þessa helgina fram á miðnætti á sunnudag að bandarískum tíma.
