Ódýrast að dvelja á Spáni árið 2013

Kaffi, kleinur, sóláburður, vatn, bjór, vín, matur og tóbak. Brúki ferðafólk eitthvað af þessu reglulega við dvöl í útlöndum þá er Spánn fyrirheitna landið árið 2013. Spánn er aftur, annað árið í röð, ódýrasti dvalarstaðurinn með tilliti til þess hvað ofangreindir hlutir kosta.

Spánn er einfaldlega ódýrasti dvalarstaður ferðafólks í Evrópu.

Breska Póststofnunin hefur birt sína árlegu verðkönnun á nokkrum helstu nauðsynjum sem ferðafólk kaupir ótt og títt á ferðalögum um heiminn. Sannarlega nytsamar upplýsingar því mörgum hættir til að gleyma öðrum kostnaði en flugi og gistingu þegar verið er að skipuleggja ferðalögin heima í eldhúsi. En líklega skjagar annar kostnaður í ferðinni vel upp í það sem greitt er fyrir ferðalagið sjálft og þak yfir höfuðið.

Vitaskuld má deila um nytsemi eða áreiðanleika slíkrar könnunar enda aðeins tekið verð á einum einasta stað í hverju landi fyrir sig. Hún gefur þó ákveðnar vísbendingar enda í öllum tilvikum um vinsæla ferðamannastaði að ræða.

Í körfunni sem um ræðir er nákvæmt verð á eftirtöldu: kaffibolli á kaffihúsi, flaska af bjór á bar, glas af gosi á bar, vínglas á bar, 1,5 lítri af ökelduvatni úr matvörubúð, 200 ml sóláburður, vindlingapakki og þriggja rétta máltíð með víni á veitingastað.

Þessi pakki samanlagt er ódýrastur á Spáni og Sri Lanka og hefur það ekkert breyst frá fyrra ári. Ekki er heldur amalegt að verð lækkar örlítið á Spáni milli ára en í töflunni má sjá verð fyrir ári innan sviga.