Marta Smarta í Mogganum auglýsir í gær feitt og duglega nýja bók á markaðnum en þó var hvergi gefið til kynna að verið væri að auglýsa nýja bók.
Vegabréf skal ALLTAF geyma á öruggum stað. Það merkir ekki handtaskan þín.
Það er eftir öðru að miðill sem vill láta taka sig alvarlega skuli blygðunarlaust auglýsa bækur lon og don án þess að blikka auga og án þess að veita lesendum þann sjálfsagða rétt að skilja á milli ritstjórnarefnis og auglýsinga.
Það gerir Marta Smarta með grein og miklu vefviðtali við Evu Dögg Sigurgeirsdóttur sem fengið hefur titilinn ofurskutla í fjölmiðlum eftir að hún hætti sem útstillingarstjóri Smáralindar. Sjónvarpsviðtalið gengur út á að Eva opnar handtöskuna sína og er geysispennandi efni í alla staði.
Látum milli hluta liggja að tíma og plássi sé eytt í að kynna nýja skvísubók enda álíka mikill skortur á þeim og atómum.
Það sem fer fyrir fögur brjóst Fararheilsmeðlima er sú staðreynd að umrædd Eva Dögg mælir með því að hafa vegabréfið alltaf í handtöskunni „ef ske kynni að hún þyrfti á því að halda.“
Hvað eiga Jón og Gunna að lesa í að miðaldra „skvísa“ mæli með að hafa vegabréfið í handtöskunni „ef ske kynni“ að hún þyrfti á því að halda. Er henni svona oft boðið fyrirvaralaust til útlanda? Er hún að gera eitthvað vafasamt erlendis og þarf skyndilega að komast heim? Það kemur ekki fram.
En í guðanna bænum EKKI hafa vegabréfið í handtöskunni á ferðum erlendis. Jafnvel þó Eva Dögg ofurskutla sé flott fyrirmynd og vinsæl pía.
Mjög algengt er að stolið sé úr handtöskum kvenna erlendis og nokkuð algengt að heilu töskunum sé stolið, þær hreinlega rifnar af gáttuðu kvenfólki og gerningsmenn hlaupið á brott. Bresk könnun frá síðasta ári sýndi fram á að samkvæmt tölum þarlendra tryggingafélaga urðu þrjár af hverjum tíu konum fyrir því á ferðalögum að tösku þeirra var stolið eða stolið úr tösku þeirra.
Að missa vegabréf eða týna á erlendri grundu er ekkert grín í besta falli. Geymdu vegabréfið í læstri hirslu á gististaðnum. Ella gætu minningarnar um rómantísku stundirnar á bökkum Signu eða unaðslega dvölina í svítunni á The Palm í Dúbai horfið eins og Eva Dögg fyrir sólu.
