Það er ekki til það flugfélag í heiminum sem ekki leitar enn leiða til að kreista hverja krónu út úr rekstrinum og þykir reyndar mörgum farþeganum þegar of langt gengið í því tilliti. Nú ætlar flugfélagið Cathay Pacific senn að bjóða áhugasömum að gera tilboð í betri sæti um borð í vélum þeirra.
Viðskiptafarrými Cathay er ekkert slor. Mynd Luke Lai
Ástæðan sögð vera sú að of mikið af dýrari sætum um borð hjá Cathay séu tóm þegar farið er í loftið. Það er dauður peningur svo vitnað sé í viðskiptamenntaða. Ýmsar leiðir hafa verið farnar gegnum tíðina. Meiri og betri þjónusta, forgangur í röð, sæti sem leggja má aftur og svo framvegis en allt kemur fyrir ekki. Almennt er ekki uppselt á viðskiptafarrými og í önnur dýrari sæti hjá flestum flugfélögum.
Nú geta flugfarþegar gert tilboð í betri sæti eða farrými áður en lagt er í ferðina og eins og hefð er fyrir á uppboðum hlýtur sá hnossið sem best býður. Viðkomandi fær að vita um vinninginn fjórum dögum fyrir brottför að því er fram kemur í South China Morning Post.
Plúsinn auðvitað sá, eins og á öllum uppboðum, að stundum er eftirspurn það lítil að meðalJón og meðalGunna gætu af og til með þessu móti hallað sér aftur á fyrsta farrými með koníak og Dolce & Gabbana súkkulaði og brosað út í eitt án þess að hafa eytt mikið hærri upphæð en annars.
