Hinar þekktu íbúða- og hótelbókunarvélar Airbnb.com, Booking.com og Tripadvisor.com brjóta alþjóðalög að mati heimastjórnar Palestínu en allir þrír aðilar leigja út herbergi í íbúðum eða gististöðum á svæðum sem Ísraelar hafa ólöglega sölsað undir sig á Vesturbakkanum.
Ísraelsmenn sölsa undir sig landsvæði og leigja svo út til túrista eins og ekkert sé sjálfsagðara…
Þessar ásakanir heimastjórnarinnar þykja réttmætar að mati þeirra sem til þekkja en herferð gegn Tripadvisor og Booking hefur verið í gangi um nokkurt skeið vegna þessa. Nú hefur hin sívinsæla íbúðaleiga Airbnb bæst í hópinn eins og Washington Post greinir frá.
Þar kemur fram að ísraelskt landtökufólk gerði sér svo mikinn mat úr því að Palestínumenn væru að kvarta yfir íbúðaleigum í ólöglegum byggðum að það snarfjölgaði íbúðum til leigu á skrá Airbnb í kjölfarið.
Smekklegt eða hitt þó heldur. Þess má geta að Icelandair, Wow Air og Dohop bjóða öll upp á bókunarþjónustu Booking.com ef þér þykir við hæfi að eiga viðskipti við slíka aðila.
