Sagt er að þolinmæði þrautir vinni þó deila megi um slíkt í tilfelli krabbameinssjúklinga. En annað er það sem þolinmæði getur haft í för; bestu kjör á ferðum.
Lúxusskipið Norwegian Epic þykir með þeim betri og mikið má vera að leiðist fólki um borð. Mynd NCL
Þar er átt við þá þolinmæði sem oft þarf til ef grípa á gæs þegar ferðatilboð detta inn með löngum fyrirvara. Við viljum jú flest fá hlutina upp í hendur eigi síðar en strax og almennt er þolinmæði á undanhaldi.
Þörf er þó á slíku langi fólk að sigla um Miðjarðarhaf í vikustund í nóvember næstkomandi um borð í lúxusdalli með fullu fæði fyrir lágmarksverð.
Þar um að ræða siglingu Norwegian Epic frá Barcelona áleiðis til Napolí, Civitavecchia/Róm og Livorno áður en lagt er í hann til Cannes í Frakklandi og síðan Mallorca áður en komið er í höfn í Barcelona að nýju.
Stutt en laggott og minnst tíu tíma stopp á hverjum stað fyrir sig sem gefur færi að kíkja til klassískra staða á borð við Róm, Vesúvíus, Písa og Flórens svo einhverjir séu nefndir. Ágætt líka að þetta er vel utan háannatíma svo ekki þarf að troðast um í þvögum ferðafólks til að sjá undur þessara borga.
Þessi ákveðni túr fæst nú gegnum þýska ferðaskrifstofu í innriklefa og með flugi til og frá Berlín niður í 121 þúsund krónur á mann miðað við gengi dagsins eða samtals 242 þúsund á hjón eða par. Frá Íslandi og til baka er vel komist niður í 25 þúsund krónur með góðum fyrirvara á mann eða 50 þúsund samtals og þannig er heildarkostnaður á þessari ferð undir 300 þúsund. Svo má bæta við nokkrum dögum í Berlín ef sá gállinn er á fólki.
Allt um þessa ákveðnu ferð hér. Hér er líka vegvísir okkar til Berlínar / Rómar / Barcelona / Mallorca / Napolí ef það gagnast einhverjum.
Ekki gleyma heldur hótelbókunarvél okkar ef þú vilt gista í Berlín. Hún hefur ekki verið valin sú besta í veröldinni tvö ár í röð fyrir ekki neitt.
