Gangi spár loftslagsvísindamanna eftir gæti orðið töluvert óþægilegra að fljúga til og frá Íslandi í framtíðinni en raunin er nú. Líkön sýna að ókyrrð í lofti á þessum slóðum gæti meira en tvöfaldast frá því sem nú er.
Mun meiri og verri ókyrrð í framtíðinni. Mynd Ahmed Kapoor
Einn úr ritstjórn Fararheill hefur orðið vitni að tiltölulega alvarlegum meiðslum flugþjóns þegar flogið var óvænt inn í mikla ókyrrð yfir Indlandi fyrir nokkrum árum síðan. Slíkum slysum fer fjölgandi og samkvæmt reiknilíkönum vísindamanna verður ókyrrð í lofti bæði algengari og verri á næstu árum og áratugum. Allt að 40% meiri ókyrrð en nú gerist og allt að því 170 prósent oftar þegar líða fer á öldina. Vægast sagt óspennandi tilhugsun.
Ástæðan er síaukinn koltvísýringur í andrúmslofti jarðar sem fræðimenn segja ljóst að hafi veruleg áhrif á svokallaða skotvinda í háloftunum. Það eru skotvindar sem valda ókyrrð af því taginu sem ekki er hægt að sjá fyrir með veðurkortum eða radar. Slík ókyrrð gerist fyrirvaralaust og það jafnvel í besta veðri.
Það er því líklegra ekki til betri ástæða að kýla á draumaferðina þína núna en ekki síðar á ævinni því óhætt er að fullyrða að töluverður fjöldi fólks hugsar sig tvisvar um að fljúga þegar og ef slæm ókyrrð verður normið en ekki undantekning eins og nú er.
