Fyrsta áætlunarflug Icelandair til Denver borgar í Kolóradófylki í Bandaríkjunum er orðin staðreynd. Þar með opnast íslenskum ferðalöngum ýmsar nýjar leiðir til ferðalaga.
Jamm, Denver er með sína eigin Októberfest ár hvert auk margra annarra hátíða sem bragð er að
Mun Icelandair eftirleiðis bjóða flug fjórum sinnum í viku til og frá Denver en sérstök Íslandskynning fer fram í borginni um næstu helgi vegna þessara tíðinda og í henni tekur þátt Steingrímur J. Sigfússon, efnahags- og viðskiptaráðherra.
Er þetta níundi áfangastaður Icelandair í vesturheimi og lausleg leit á vef flugfélagsins leiðir í ljós að vel hefur selst af sætum því fargjöld á ódýrasta farrými eru mikið til uppseld. Þannig verður vart komist fram og aftur í júní og júlí undir 200 þúsund krónum samkvæmt vef Icelandair nú. Það hríðfellur þó um miðjan ágúst og finnast sæti ódýrust 14. til 26. ágúst á 104 þúsund krónur rúmar.
Eins og Fararheill hefur greint frá er ekki aðeins fyrsta flokks fjalllendi og náttúra í Denver og nágrenni heldur er líka þaðan komist ódýrt áfram með Frontier lágfargjaldaflugfélaginu sem hefur höfuðstöðvar sínar í Denver. Frontier býður marga fína pakka áfram í Bandaríkjunum ellegar til Karabíska eða Mið-Ameríku.
