Hvers kyns aukagjöld sem flugfélögin leggja á farþega sína eru farin að skipta verulegu máli í rekstri flestra þeirra því nýjar tölur benda til að 20 prósent af hagnaði hvers flugfélags megi rekja beint til slíkra aukagjalda.
Þar er verið að meina gjöld þau er flugfélög flest taka nú fyrir þjónustu sem áður fyrr var innifalin í heildarverði flugferðar eins og mat um borð, farangur og eldsneyti. Er þó ekki verið að meina skatta og gjöld sem einnig hafa aukist töluvert hin síðari ár.
Sú þróun að bæta aukagjöldum ofan á verðið er farin að velta æði háum fjárhæðum og sýnir ný könnun flugtæknirisans Amadeus að milli áranna 2009 og 2010 mátti rekja 60 prósent allrar tekjuaukningar hjá stærstu flugfélögum heims beint til umræddra aukagjalda.
Iceland Express er eitt þeirra flugfélaga sem bæta aukagjöldum ofan á auglýst verð sín. Við bókum kallast fyrstu aukagjöld öryggis- og eldsneytiskostnaður og nemur 6.900 krónum. Önnur gjöld sem það flugfélag bætir við að ósk farþegans eru 99 fyrir smáskilaboð með staðfestingu á farmiðakaupum. Hækkar sú upphæð í 1.750 krónur ef kaupandi vill fá póstsenda kvittun. Greiða þarf aukalega 3.600 krónur á tösku fyrir farangur umfram 20 kíló og að síðustu tekur félagið einhverja þúsundkalla kaupi fólk mat og drykki meðan á fluginu stendur.
Segir sig sjálft að tíu þúsund krónur í aukagjöld fyrir flugmiða sem kostar 15 til 30 þúsund aðra leiðina til Evrópu er fljótt að telja fyrir flugfélagið.
