Einhvers staðar í veröldinni yrðu sett mörg spurningarmerki við að einn og sami ráðherrann fari bæði með málefni iðnaðar og umhverfismála. Það þykir þó eðlilegasta mál á Íslandi og í Tanzaníu þar sem ráðherra hefur gefið grænt ljós á úranvinnslu á einu mikilvægasta verndarsvæði heims.
Að stærð er Selous mun stærra verndarsvæði villtra dýra en önnur í Afríku. Mynd Marco Zanferrari
Gefur ráðherrann lítið fyrir gagnrýni á að vinna úran á Selous verndarsvæðinu sem er eitt það stærsta í heiminum og mun stærra griðasvæði villtra dýra en hinn öllu þekktari Serengeti þjóðgarður svo dæmi sé tekið.
Fimm milljón ferkílómetra svæði Selous svo mikilvægt að það er á Heimsminjaskrá Sameinuðu þjóðanna sem einstakur staður á heimsvísu. Þar valsa um fílar, ljón, svartir nashyrningar, gíraffar og krókódílar í þokkalegum friði frá mannfólkinu.
En ekki lengur. Námuvinnsla á úrani er hafin með tilheyrandi jarðraski og hugsanlegri mengun andrúmslofts og vatnsbóla en úran er fyrst og fremst unnið til nota sem kjarnorkueldsneyti.
Þetta er í annað skipti á skömmum tíma sem yfirvöld í Tanzaníu grípa verulega inn í náttúru landsins. Aðeins vegna mikilla mótmæla heimamanna og erlendra ríkja hættu stjórnvöld við að leggja fjögurra akreina malbikaðan veg þvert yfir hina frægu Serengeti sléttu.
Kannski ráð að drífa sig í safarí í Tanzaníu áður en einu villtu dýrin þar verða annaðhvort dauð eða í búrum.
