Skip to main content
E kki nokkur lifandi sála á klakanum nema kannski ósýnilegur sendiherra Sameinuðu arabísku furstadæmanna hér á landi veit hvar Ras Al Khaimah er að finna. Það er samt þangað sem Vita, með tilstuðlan Icelandair, vill bjóða okkur í febrúar á næsta ári fyrir tæplega 200 þúsund kall á mann.

Ekkert amalegur staður svona í furstadæmis-tilliti en fjarri stöðum sem allir þekkja.

Aldrei mínus þegar innlendar ferðaskrifstofur bjóða landanum upp á ferðir til annarra staða en þessara hefðbundnu. Við hér miklir aðdáendur þess og efalítið við ekki ein um það. Sum okkar þola illa að hanga á sama staðnum lon og don árum saman.

Það því gleðiefni að sjá að ein sérferð ferðaskrifstofunnar Vita í febrúar á næsta ári er túr alla leið til hinna sólríku Sameinuðu arabísku furstadæma (SAF.). Þið vitið; Dúbaí og Abú Dhabí og aðeins 55 kílómetrar yfir hafið til Íran.

Túrinn þokkalega dýr fyrir aðeins níu daga fyrir utan að SAF er almennt mjög í dýrari kantinum hvort sem um er að ræða einfaldan landa á barnum eða kvenkynslanda í tískuvöruverslun. Mörg hótel hér heimta til dæmis 600 kall extra ef þú vilt ábót á kaffið við morgunverðarborðið svona til að gefa eina hugmynd.

En við klórum okkur aðeins í haus varðandi ferð Vita sem lesa má nánar um hér. Kynning Vita miðast við að dvelja í annaðhvort Abu Dhabí eða Dúbaí sem eru langvinsælustu staðirnir í landinu. En hvers vegna í ósköpunum er lent í rassi klukkustund frá Dúbaí og tveimur klukkustundum frá Abú Dhabí? Með „rassi” meinum við Ras Al Khamaih sem er vissulega borg og ekkert sýnu verri en hinar þekktari. En Dúbaí á þennan fimm stjörnu flugvöll og Abú Dhabí líka. Hvers vegna velja einhvern súran varaflugvöll?

Súri flugvöllurinn fær extra merkingu þegar og ef áhugasamir gera sér grein fyrir að flugið út tekur hvorki meira né minna en tæpar TÓLF klukkustundir og litlu skemmra heim aftur. Með öðrum orðum; Vita vill fljúga þér í tólf klukkustundir til Ras Al Khamaih og svo henda þér í klukkustund eða tvær í rútu í ofanálag til að koma þér á áfangastað.

Spennandi ekki satt? Og príma þjónusta í þokkabót (ekki.)