Frá og með síðustu áramótum tóku gildi nýjar reglur í sólskinsríkinu Flórída í Bandaríkjunum sem kveða á um að allir erlendir ferðamenn verði að hafa alþjóðleg ökuskírteini í viðbót við sín hefðbundnu skírteini til að mega aka um á vegum fylkisins. Góðu heilli hefur þessi ákvörðun verið dregin til baka að minnsta kosti tímabundið.
Í framtíðinni þurfa Íslendingar alþjóðleg ökuskírteini á ferð um Flórída
Hingað til hefur hver sem er getað ekið hvert sem er innan fylkismarka án þess að framvísa öðru en gildu ökuskírteini frá heimalandinu. En lögreglan í fylkinu fékk breytingar í gegn því of langan tíma tók fyrir viðkomandi að ganga úr skugga um gildi ökuskírteina á hinum ýmsu tungumálum.
En nú hafa stjórnvöld í Flórída sett þessa kröfu á ís að sinni vegna mikilla mótmæla og þá sérstaklega ferðamanna frá Kanada og Bretlandi hvers ökuskírteini eru vitaskuld á ensku og því auðskilin.
Það er hins vegar aðeins tímabundið meðan verið er að breyta lögum og undanskilja ferðamenn frá þessum löndum eftirleiðis. Íslendingar munu þurfa alþjóðleg ökuskírteini í framtíðinni til að þvælast um Orlando og nágrenni og vissara að ganga í það fyrr en síðar því viðurlög við akstri án slíks er bæði sekt og fangelsisdómur.
Hér á landi er hægt að verða sér úti um slík skírteini á skrifstofu Félags íslenskra bifreiðareigenda.
