Hvar er besta golfið haustið 2012?

Nokkuð er um að forvitnir lesendur hafi samband og vilji vita hvert og hjá hverjum hagkvæmast sé að kaupa golfferð þetta haustið. Eins og Fararheill hefur fjallað um eru haustin gósentími ferðaskrifstofanna í golfferðunum og úrvalið allsæmilegt.

En það er kannski fullmikil einföldun að kanna hvar hagkvæmast sé að spila golf erlendis næstu mánuðina því við Íslendingar erum kröfuharðir og ekki dugir að senda fólk á einhverja lummuvelli jafnvel þó það dugi þeim er hæsta hafa forgjöf.

Ritstjórn hefur því tekið saman á einn og sama listann allar golfferðir í boði frá septemberbyrjun og fram til loka október og reynt að auðvelda fólki að bera saman. Erfitt er að dæma slíkar ferðir per se enda óskir fólks misjafnar og veskið misþykkt að auki.

En í öllu falli má hér sjá ferðirnar, lengd þeirra og kostnað miðað við tvo fullorðna í ódýrustu gistingu í boði.

Til að fá sem gleggsta mynd af verðinu er deilt í dagafjölda og þá sést einna best hvað hver einasti dagur kostar hjá hverjum og einum.

Sjá má á listanum að þó heildarverð geti almennt verið svipuð munar töluverðu þegar deilt er niður á daga hjá hverjum og einum. Einnig munar miklu á hvort í boði er aðeins morgunverður eða hvort hálft eða fullt fæði er í boði. Þá má ekki gleyma að ferðir til og frá flugvelli geta aldeilis kostað skildinginn.

Að síðustu er misjafnt hvort fararstjórar fylgja með eður ei. Almennt eru þeir þó óþarfir í golfferðum að mati Fararheill enda kylfingar almennt vel sigldir og vanir og Svíþjóð, England, Skotland og Spánn, einu staðirnir í boði, fara seint í bækur sem sérstaklega flóknir eða hættulegir áfangastaðir.