Fljótlega eftir síðustu áramót fór að bera á kvörtunum á fésbókar- og tístvef Icelandair sem ekki höfðu sést þar áður. Viðskiptavinir langeygir eftir svörum við töfum, týndum töskum og bótum hvers kyns.
Enginn vilji virðist vera hjá Icelandair til að bæta þjónusta sína við viðskiptavini. Skjáskot
Fararheill greindi frá stöðu mála á þessum tíma og við undruðumst þegar flugfélagið tilkynnti opinberlega í vor að biðtími eftir svörum við kvörtunum gæti orðið allt að því 30 dagar. Fram að þessum tíma hafði ekki borið mjög mikið á kvörtunum vegna tafa. Ekki aðeins tafa hjá flugfélaginu sjálfu heldur og hjá þjónustuveri flugfélagsins. Greinilegt var að þar var ekki mannað til samræmis við stóraukinn fjölda farþega sem er eina skýringin á hvers vegna starfsfólk tók sér heilan mánuð til að svara skeytum viðskiptavina.
Hjá góðum fyrirtækjum er raunin sú, sé einhver virðing borin fyrir viðskiptavininum, að komi upp vandamál er strax farið í það að lagfæra, leiðrétta og bæta. Ekki er kennt í viðskiptafræðinni að láta viðskiptavin bíða vikum saman eftir svörum nema í kaflanum er varðar fyrirtæki sem eru á sömu leið og risaeðlurnar.
En nú eru liðnir sex til sjö mánuðir síðan fór að bera alvarlega á löngum biðtíma í þjónustuveri og enn rúlla stanslítið inn kvartanir á samfélagsmiðlum. Samanber meðfylgjandi skjáskot. Þar er ósvarað einum tíu skeytum frá einum aðila meðan annar undrast algera þögn um týnda tösku tæpum tveimur sólarhringum eftir að hún týndist. Og þetta aðeins eitt skeyti frá mörgum fúlum á samfélagsvefum Icelandair.
Kannski hugsa forráðamenn Icelandair að þjónusta við farþega sé ekki svo ýkja mikilvæg. Það er jú ekki eins og það lið sem hefur þegar flogið með þeim skipti miklu máli. Það í öllu falli breytir ekki því að það er stöffað að gera og seðlarnir mokast inn án þess að menn þurfi að lyfta litlafingri. Svo er líka svo dýrt að ráða hæft fólk í þjónustuverið.
Í öllu falli má vera kristaltært að þegar súra skinkan frá Skinkusamlaginu sem þú keyptir út í búð í janúar er aftur súr í september þegar þú gefur Skinkusamlaginu annan séns er endapunkturinn kominn. Þá er nokkuð 100 prósent að enginn vilji er til að bæta hlutina.
Það segir kannski sitt að á lista VR yfir fyrirtæki ársins 2015 er risafyrirtækið Icelandair í sæti númer 62 af 83 alls eða í fallbaráttu svo við bregðum fyrir okkur íþróttamáli. Innheimtufyrirtækið Motus er fyrir ofan Icelandair á listanum yfir hversu gott er að starfa hjá fyrirtækinu. Segir það ekki dálitla sögu um þetta allt saman. Ef staffið er ekki ánægt í starfi er engin leið að viðskiptavinir verði það.
