Vart hefur farið framhjá fróðleiksfúsu fólki að Fararheill gagnrýndi Leifsstöð og aðstæður þar harkalega fyrir skömmu. Þá helst að setja stækkun verslunarsvæðis í forgang þegar löngu er ljóst að stöðin er sprungin. Við hefðum fremur kosið lazyBoy á línuna en við fáum náttúrulega ekki allt sem við viljum.
Flott kynning annars vegar og svo raunin hins vegar. Mynd Skjáskjot/Ruv/IBS
Ólíkt sumum öðrum sem við gagnrýnum fáum við að minnsta kosti svör frá stjórnendum sem varpa ljósi á hvers vegna biðtími á tímum er allt of langur. Fleiri stjórnendur fyrirtækja í ferðaþjónustu mættu fara á námskeiðið „að taka uppbyggilegri gagnrýni án þess að hlaupa í fýlu“ en svona er þetta á litla Íslandi.
Hvers vegna miklar tafir?
Biðtími hefur minnkað frá því sem mest var fyrir nokkrum vikum en getur samt sem áður verið langur á helstu álagstímum sólarhringsins. Þetta er yfirleitt mjög stuttur tími sem helsti álagstíminn er þannig að við erum einfaldlega að benda fólki á að reyna að koma fyrr á þessum mesta álagstíma. Biðtíminn getur auk þess verið mislangur, stundum koma margar rútur ferðamanna á sama tíma og þá skapast á stuttum tíma mjög löng röð. Flestum finnst betra að bíða á biðsvæðinu /veitingasvæðinu inni í flugstöðinni en að bíða í röð og því hvetjum við fólk til að mæta fyrr.
Hvers vegna eyða tíma að fylgjast með töfum og seinkunum í stað þess að bregðast við?
Við setjum mannskap í að fylgjast með biðröðum til þess að hægt sé að vinna að úrbótum, með því að fylgjast með þeim komumst við að því hvaða aðgerða er þörf til þess að stytta biðraðirnar og förum svo í þær.
Hvers vegna hvetja fólk til að mæta með árs fyrirvara í flug (eða 2,5 til 3 tíma)?
Það er ekki rétt að orðalag tilkynningarinnar á vef okkar hafi breyst eftir umfjöllun Fararheilla, talað hefur verið um 2,5-3 tíma frá upphafi. Hins vegar túlkuðu sumir fjölmiðlar það þannig að við bæðum fólk að koma að lágmarki 3 tímum fyrir flug.
Kúdos á Leifsstöðvarfólk fyrir svörin. En nokkur óþægileg svör vantar ennþá.
Hvers vegna stækka verslunarpláss til mikilla muna í flugstöð sem löngu er sprungin? Mátti ekki bíða með það? Hagnaður af verslun merkilegri en ánægja flugfarþega?
Hvers vegna er svona auðvelt að smygla sprengjum gegnum öryggisleit Leifsstöðvar? Hefur stjórnin engar áhyggjur af öryggi farþega? Hver er reynsla öryggisfulltrúa sem leita og hvað fá þeir í laun?
…
Það liggur fyrir, og hefur legið lengi, að Leifsstöð er sprungin. Svo sprungin að Icelandair skoðar að byggja sína eigin flugstöð. En að gamni slepptu hefur sennilega ekki farið fram hjá neinum að flug er orðið töluvert leiðinlegri pakki en það hefur nokkurn tímann verið. Löng bið í keimlíkum og þreyttum flugstöðvum er algeng. Ekki má hafa títuprjón með sér inn í flugstöðina. Þjónusta heyrir sögunni til. Vart pláss til að skipta um skoðun í þröngum flugsætum flestra flugfélaga. Sala á nýra og hjarta dugar varla til að kaupa samloku eða smoothie í flugstöðinni. Og næstum ekkert flugfélag sýnir lit ef eitthvað fer úrskeiðis. Biðtími eftir svörum við vandamálum hjá Icelandair er rúmur mánuður og lokað er hjá þjónustudeild Wow Air um helgar. Svo aðeins tvo dæmi séu tekin.
Halló Halló! Eins og enginn þarna úti sé reiðubúinn að greiða aðeins meira fyrir alvöru þjónustu. Við viljum öll láta koma fram við okkur eins og manneskjur en ekki bara peningur í sarpinn fyrir fjárfesta. Fyrirtækin auglýsa fyrir milljarða til að fá viðskiptin en eftir það má fólk bara eiga sig og stórvandamál að fá bætt þegar taska týnist eða fólk lendir í alvarlegum töfum.
Hvar er mannlegi þátturinn? Þið vitið, þetta sem gerir þjóðfélag að þjóðfélagi?
Svona meðan við bíðum eftir svörum kynnum við okkur hvað heimsmeistarinn í hótelbókunum er að bjóða þessa stundina.
