Svo merkilegt sem það nú er þá virðast það vera Indverjar og Kínverjar sem bera hvað mesta virðingu fyrir náttúrunni ef marka má nýja könnun.
Leiðir hún í ljós að flugfarþegar frá þessum tveimur löndum kolefnisjafna allt að 44 prósent af flugferðum sínum.
Eru þetta töluvert fleiri farþegar en kolefnisjafna flugferðir sínar til dæmis í Bandaríkjunum og Evrópu þar sem hlutfallið hefur verið milli átta og tólf prósent þegar best lætur. Koma tölurnar úr viðamikilli könnun SITA á tólf af stærstu flugvöllum heimsins.
Hér heima á Fróni er teljandi á fingrum annarrar handar hversu margir greiða aukalega fyrir kolefnisjöfnun. Svo fáir reyndar að engin innlend flugfélög bjóða lengur upp á slíkt en Icelandair reyndi það um langa hríð hér áður með litlum árangri.
