Þig dauðlangar allt í einu til New York. Ekki aðeins þarftu að lyfta þér aðeins upp í alvöru siðmenningu heldur og kaupa föt á börnin og makann á verði sem eðlilegt er. Góð ráð eru þó yfirleitt mjög dýr í þessu tilfelli.
Hér er sóknarfæri í fluginu að okkar mati. Tilboðsferðir með litlum sem engum fyrirvara. skjáskot
Sjáðu til, það hefur jafnan verið viðskiptamódel Icelandair og Delta sem eru einu flugfélögin sem fljúga milli Keflavíkur og New York að selja á hæsta verði þær ferðir sem stutt er í. Þannig þarf sá sem getur ekki á sér heilum tekið nema komast til New York strax að greiða að minnsta kosti 65 þúsund krónur með Icelandair miðað við bókunarstöðu þegar þetta er skrifað tvær vikur fram í tímann. Það er bara önnur leiðin og fram og aftur komið vel yfir hundrað þúsund krónur.
En hvað ef hægt væri að komast til New York strax á föstudaginn kemur og það niður í nítján þúsund krónur aðra leiðina?
Norwegian til hjálpar. Norska lággjaldaflugfélagið er að bjóða nýjung á vef sínum þennan daginn sem þeir kjósa að kalla Weekend special. Ekki aðeins er þar um gjafverð á tilteknum flugum að ræða heldur og með litlum fyrirvara eða allt niður í fjóra daga. Og lægsta verð aðra leið milli Osló og New York í þarnæstu viku er 18.626 krónur miðað við gengið. Þar auðvitað er enginn farangur innifalinn og við þurfum auðvitað líka að koma okkur til Osló í einum grænum sem getur reynst flókið og dýrt. En ekki alltaf.
Sjálfsagt að hafa þennan möguleika í huga ef vesturferð er algjört möst eins og sagt er.
