Áður höfum við hjá Fararheill grátið það hversu lítið framboð er af ferðum héðan til Króatíu. Fyrir utan einstöku „sérferðir“ er ekkert í boði þangað sem vekur athygli þegar haft er í huga að samkvæmt árslistum Google leita fleiri Norðmenn og Svíar að ferðatilboðum þangað en annað.
Hvernig væri að prófa eitthvað nýtt næstu mánuðina…
Það kemur ekki á óvart fyrir þeim er heimsótt hafa þennan hluta Balkanskagans. Hér er landslag sem er mikils virði, strendur sem standast fyllilega allan samanburð, minjar margar sem eru með þeim heillegustu í veröldinni og verðlag er hér enn nokkuð undir því sem gerist á vinsælli stöðum.
Við verðum því að fara krókaleiðir til að njóta sólar í Króatíu og við rákumst á eitt æði safaríkt tilboð þangað í apríl og maí með bresku ferðaskrifstofunni Broadway Travel.
Þar er vikuferð í boði á glænýju fjögurra stjörnu hóteli við hina fornu og fallegu hafnarborg Dubrovnik. Hálft fæði er innifalið, ferðir til og frá flugvelli, kampavín við komu og algjörlega frítt í heilsulind hótelsins meðan á dvölinni stendur. Aldeilis dágott í alla staði. Enn betra að verðið er aðeins 63 þúsund krónur á mann miðað við tvo saman en það á við frá Gatwick. Þangað þarf jú að komast og má gera ráð fyrir 40 þúsund krónum aukalega að minnsta kosti á mann.
Alls fer vikuferðin því í hundrað þúsund krónur sem er engu að síður lágt miðað við það sem gerist og gengur og sannarlega lágt fyrir nýjan og pínulítið framandi stað.
