Okkur vitandi eru engar opinberar tölur til um þetta vandamál hérlendis en miðað við umtal og kvartanir í sólarlandaferðum eiga ekki allir svo auðvelt með svefn í miklum hita.
Frábær eyja heimsóknar Mallorca en getur verið að hitinn sé þar of mikið af hinu góða?
Það er ekki auðvelt vandamál að eiga við á stöðum þar sem næturhiti hangir í og yfir 20 gráðum sem er algengt á vinsælum sólarlandastöðum á borð við Benidorm, Kanarí eða Flórída og hvað þá enn sunnar á hnettinum.
Víst er loftkæling á öllum betri hótelum en þær græjur eins misjafnar og þær eru margar. Jafnvel á fullu blasti eiga þær stundum lítið við þrúgandi hitann. Í ofanálag virka þær ekki nema gluggar séu lokaðir og guð má vita hvaða bakteríur, skordýr eða annar viðbjóður leynist í gömlum lögnum á suðrænum hótelum.
Sem sagt, engin kjörstaða fyrir þá sem bágt eiga að sofna í miklum hita. Og sá eða sú sem sefur illa er eðli málsins samkvæmt ekki upp á sitt besta yfir daginn.
En eitt einasta ráð er þó alltaf óbrigðult og það er að ferðast ekki eða dveljast erlendis á allra heitasta tíma. Auðvitað gengur það ekki fyrir suma en þeir sem geta ættu fremur að taka frí sunnar í álfunni í apríl, maí eða október og nóvember en yfir sumartímann.
Við höfum tekið saman meðalhitastig, hátt og lágt, á nokkrum helstu áfangastöðum landans og munum birta hér á næstu dögum. Við ríðum á vaðið með Mallorca á Spáni og eins og sést glögglega á töflunni, tölur frá Accuweather, er ekki lítill hitamunur að næturlagi í apríl og ágúst. Það er HELMINGI heitara að meðaltali yfir hánótt í ágúst en það er í apríl. Hér skal hafa í huga að um meðaltalstölur er að ræða. Hitastig að næturlagi getur farið enn hærra en hér er sýnt.
