Svo þú fannst brilljant verð á ferð með Heimsferðum til Mallorca nýlega? Óvitlaust, svona áður en þú rúllar fram kortinu, að hafa í huga að eigandinn lifir dúndurgóðu lífi á því að forðast íslenska skatta. Skatta sem ætlað er að greiða fyrir vegi, sjúkrahús og menntun fyrir Íslendinga.
Viðskiptamógúll ársins hjá Frjálsri Verslun en greiðir litla sem enga skatta á Íslandi. Skjáskot
Alltaf gaman að íslenskum milljarðarmæringum. Annaðhvort vaða þeir/þær í seðlum vegna þess að pabbi átti síldarvinnslu og kvóta úti á landi og seldi, pabbi átti heildsölu með einkarétt og þeir/þær voru einkaerfingjar eða þeir/þær komust yfir banka og svindluðu og prettuðu eins og enginn væri morgundagurinn.
Eðaldæmi um þetta er Andri Már Ingólfsson, forstjóri Primera Air Group og þar með talin ferðaskrifstofan Heimsferðir. Andri fékk djobb gegnum pabba sinn sem stofnaði vinsæla ferðaskrifstofu og drengurinn tók fyrirtækið ívið lengra en pabbi gamli sá líklega fyrir.
Hann byrjaði á að flytja flugreksturinn til Danmerkur og þaðan hluta af pakkanum til Litháen, þar sem eftirlit er sirkabát núll og skattaumhverfið eftir því. Sjálfur er Andri Már eiginlega Svisslendingur enda búsettur þar með fjölskyldu sinni. Sviss velþekkt sem skattaparadís eins og viti bornu fólki er kunnugt.
Nú greinir Eiríkur Jónsson frá því að Andri Már hafi eytt 500 milljónum króna í endurbætur á kofa einum í miðborg Reykjavíkur. Fyrir utan auðvitað að kappinn á annað einbýlishús með húð og hári í sömu vinsælu götu miðborgarinnar.
Hmmm.
Þetta er jú sami eigandi og lét viðskiptavini sína bíða í heilt ár eftir skitnum bótum eftir sólarhrings töf á flugi frá Tenerife hér fyrir skömmu síðan. Sami eigandi og barðist með lögfræðingum og kjafti og klóm GEGN því að borga eyri til viðskiptavina sinna sem þurftu að eyða nótt á einskismannsbóli á Írlandi á leiðinni heim frá Kanaríeyjum.
Sami eigandi og lætur lögfræðinga sína berjast 100 prósent gegn öllum kröfum viðskiptavina um bætur vegna tafa og vesens bæði hér og erlendis.
Sami eigandi og sagði upp ÖLLU íslensku starfsfólki Primera Air svo hægt væri að ráða ódýrt vinnuafl frá austurhluta Evrópu og auka þannig gróðann handa sér og sínum.
Á meðan rennur varla skildingur frá fyrirtækinu til Íslands og þeirra viðskiptavina sem komu fyrirtækinu á fót. Endilega haltu áfram að versla við Heimsferðir og Primera Air. Það skilar sér sannarlega í ríkissjóð Íslands okkur öllum til bóta.
