Undarlegur er Engeyingurinn Björn Bjarnason. Þessi litlausi maður sem eyddi ævinni í pólitík með þeim árangri að ríkið á ekki krónu aukalega í kassanum til heilsugæslu né menntunar fyrir utan að enginn man eftir neinu sérstöku sem manngarmurinn stóð fyrir sín 50 ár á þingi, virðist haldinn þeim ranghugmyndum að hann eigi nokkur lóð til að leggja á vogarskálar.
Hugmyndin með feitum eftirlaunum er að viðkomandi fari að njóta og elska án þess að þurfa að vakna klukkan sjö alla morgna í leiðindavinnu. Björn Bjarnarson virðist ekki kveikja á þeirri peru. Mynd InnTV
Björn virðist ekki átta sig á hugtakinu feit eftirlaun. Það eru þær milljónir sem Björn þiggur mánaðarlega úr sjóðum almennings til að fara eitthvað burtu og láta ekki sjá sig meir.
Stríðsglæpamaðurinn Björn, því hann sat í ríkisstjórn Íslands sem lagði blessun yfir og lofaði aðstoð, þegar Bandaríkjamenn réðust ólöglega inn í Írak á sínum tíma, hefur sama trúverðugleika og Benny Hinn sem læknaði fatlaðra og vanskapaða hér á landi á einum einasta fundi í Laugardalshöll fyrir margt löngu.
Birni finnst þó sjálfsagt að stórherða landamæraeftirlit til að koma í veg fyrir að stríðshrjáð fólk geti komið sér fyrir á klakanum sísona. Þessi spekingur virðist ekki kveikja á þeirri 6 watta peru að sama innrás og hann stimplaði fína og flotta á sínum tíma er einmitt að valda stríðum straumi flóttamanna til Evrópu og þar með talið til Íslands þessi dægrin.
Og nú fárast maðurinn yfir að „vinstrimenn“ fari á taugum í hvert sinn sem einkavæðing kemur til tals. Kannski ef Björn læsi annað en sinn Mogga og kíkti af og til á aðrar sjónvarpsstöðvar en Faux News og ÍNN gæti kannski runnið upp fyrir kauða að einkavæðing hluta á borð við heilsugæslu, sjúkrahúsa, dómsstóla, flugstöðva og orkufyrirtækja hefur hvergi á nokkru bóli í veröldinni skapað betri né ódýrari þjónustu til lengri tíma litið en þegar ríkið stendur vaktina.
Þetta ættir þú að vita manna best Björn, eftir að hafa setið á valdastóli frá því land var numið. Eða hvaða dæmi hefur þú um að einkavæðing ríkiseigna hafi skilað almenningi feitari bita en ella? Það er ekki nóg að röfla út í eitt á ÍNN. Þú verður að koma með dæmi til að réttlæta mál þitt.
Nú kann einhver að undrast hvað ferðavefurinn Fararheill er að fárast yfir lúnum pólitíkus. Jú, Björn á vef sínum tekur undir með þeim er vilja einkavæða Leifsstöð að hluta eða öllu leyti. Hugmyndin með því sú að þá fái ríkið instant seðla til að bæta kjör öryrkja eða tvöfalda veginn til Selfoss í stað þess að sitja með „sárar“ fjárhagslegar skuldbindingar í flugstöð um langa framtíð.
Þetta er sama heimskulega gaulið og í öðrum Engeyingum og milljarðamæringum sem geta vart sofið dúr ef íslenska ríkið, lesist: íslenskur almenningur, er að þéna peninga á nokkrum hlut.
Rekstraraðili flugvalla landsins, Isavia, hefur verið að hala inn milljarða króna í plús árlega undanfarin ár og það fjármagn fer alfarið til uppbyggingar á flugvöllum og flugstöðvum í landinu. Þar með talin stækkun Leifsstöðvar sem hefur verið breytt einum sex sinnum á síðustu tíu árum til að koma til móts við aukinn ferðamannafjölda.
Björn bendir á í nýlegum pistli sínum að Kastrup flugvöllur í Kaupmannahöfn sé aðeins að hluta til í almenningseigu. Danska ríkið hefur á síðustu tuttugu árum selt tæplega 60 prósent af vellinum til einkaaðila.
Björn hefði getað tekið betri dæmi en það. Margir alþjóðaflugvellir heims eru 100% í eigu einkaaðila. Vellir á borð við Gatwick og Heathrow í London til dæmis þökk sé einkavæðingarstefnu Margrétar Thatcher. Hagnaður af rekstri Heathrow árið 2015 nam 22 milljörðum króna. Hagnaður af rekstri Gatwick sama ár litlir 18,5 milljarðar króna. Samtals hagnaður 40,5 milljarðar króna. Sem almenningur í Bretlandi, sem byggði báða velli, sér ekki tangur né tetur af.
Nú er Björn Bjarnason fjölfarinn maður og hann veit að varla hefur verið skipt um teppi á Heathrow eða Gatwick undanfarin 20 ár eða svo. Svona um það bil þann tíma sem vellirnir hafa verið í einkaeigu. Það helgast af því að allur kostnaður dregst frá tekjum og enginn forstjóri sem stendur í rekstri og þarf að sýna hluthöfum snilli sína ár eftir ár er að hafa miklar áhyggjur af rykföllnum teppum. Það skapar ömurleg níð á samfélagsmiðlum en það stoppar ekkert ferðamannastrauminn til London. Svona svipað og Icelandair hefur þurft að takast á við undanfarin ár. Ömurlegar einkunnir á fésbókinni fyrir þjónustu en stjórinn veit sem er að það eru ekki svo margar leiðir til Íslands að það skipti máli. Hann er því ekkert að laga draslið.
Björn veit líka að fátækt og ójöfnuður er stórkostlegt vandamál í Bretlandi og slíkt jókst hröðum skrefum í kjölfar einkavæðingarstefnu Thatcher. Bretland á að heita fyrsta flokks ríki en hvergi í miðborgum borga landsins er þverfótað fyrir heimilislausu fólki. Heldur Björn að ef ríkið hefði nú hangið á sínum helstu flugvöllum og fengið inn 800 milljarða króna eða svo í tekjur af þeim frá aldamótum að fjöldi fátækra og heimilislausra í Bretlandi væri jafn stórt vandamál og það er í dag?
