„Sæl veriði hjá Fararheill. Mig langar að vita hvort þekkt bílaleiga á flugvellinum í París geti sísona tekið 40 þúsund krónur af kreditkortinu mínu vegna djúprar rispu á annarri hlið bílaleigubíls sem ég leigði í vikutíma. Rispu sem ég kannast ekki við en bílaleigan var ekki opin þegar ég skilaði bílnum til að taka af allan vafa?“
Reyndu að forðast í lengstu lög að skila bílaleigubíl utan opnunartíma. Það veitir óprúttnum tækifæri til að græða enn frekar á þér.
Svo hljóðar inntakið í skeyti sem við fengum fyrr í vikunni. Þar er einstaklingur ekki sáttur við að bílaleiga leyfði sér að rífa 40 þúsund kall aukalega af kreditkorti viðkomandi tæpum mánuði eftir skil á bílaleigubíl á Charles De Gaulle flugvellinum í París. Ástæðan sögð djúp rispa öðru megin á bílnum.
Við þessu er ekkert einfalt svar í raun. Það fer eftir skilmálum viðkomandi bílaleigu hvort þeim er heimilt að taka af kortinu tiltekna upphæð ef skemmdir reynast vera á bílnum.
Fræðilega samkvæmt Evrópureglum á þetta að virka þannig að bílaleigum er vissulega heimilt að gjaldfæra, án samráðs við korthafa, smærri upphæðir ef í ljós kemur skemmd eða skemmdir þegar bifreið er skilað. Það bæði skiljanlegt og eðlilegt. Bílar eru dýr tæki og auðvitað verður leigusali að tryggja sig gegn því að bíll komi klesstur og ljótur úr leigu. Sérstaklega er það mikilvægt þar sem flug nútímans fara fram á öllum tímum sólarhringsins meðan fæstar bílaleigur eru mannaðar 24 tíma á sólarhring.
En Evrópureglur kveða ennfremur á um að sé um háa upphæð að ræða þá geti bílaleiga ekki gjaldfært kostnað nema með samráði við leigutaka og korthafa.
Allir reyna alltaf að græða eins mikið á þér og hægt er. Aldrei gleyma því
Gallinn við þetta annars ágæta kerfi sá að ekki er tiltekið hvað er lág upphæð og hvað sé há upphæð. Fyrir láglaunafólk í flestum löndum heims eru 20 þúsund krónur stór upphæð meðan hátekjufólk kippir sér ekkert upp við 200 þúsund króna aukareikning. Auðvitað vonlaust að miða kerfið við tekjur fólks; skemmdir eða sektir kosta jú það sama hvort sem leigutaki er blankur eða ríkur. En reglur sem tilgreina ótilteknar „háar, eða „lágar“ fjárhæðir í tilfellum sem þessum geta verið verri en engar.
Málið versnar til muna vegna þess að bílnum var skilað seint um kvöld og enginn á stasjón að taka á móti. Bílnum aðeins lagt í tiltekið stæði og lyklum skilað í box eða lúgu. Það merkir að leigjandinn hefur engin tök á því að yfirfara bílinn með starfsmanni bílaleigunnar en slíkt er jú frumskilyrði ef sanna á að ekkert hafi komið fyrir bíltíkina meðan á leigutíma stóð.
Þetta síðastnefnda er enn mikilvægara sökum þess að bílaleigur eru fyrirtæki sem snúast um að græða peninga. Mörg slíkt, og jafnvel stórfyrirtæki, hika ekki við að reyna að næla í auðveldan aukapening sé þess kostur og leigutaki sem skilar bifreið utan opnunartíma er príma fórnarlamb í það. Það er jú engin leið undir sólinni fyrir leigutakann, sem yfirleitt er kominn til síns heima í útlöndum, að afsanna yfirlýsingar bílaleigunnar um „einhverjar skemmdir.“ Bílaleigurnar vita sem er að ef upphæðin er ekkert frámunalega há eru fæstir sem gera vesen úr. Ómakið við að sanna að engin rispa hafi verið á x-bifreið við skil erlendis er einfaldlega of mikið og kostnaðarsamt fyrir Jón og Gunnu Meðalfólk.
Auðvitað er rosalega þægilegt að geta skilað bílaleigubíl vel utan opnunartíma ef þörf er á. Tóm steypa er fyrir fjölskyldu með bíl á leigu í Alicante og flug heim um miðnætti að skottast á flugvöllinn fyrir klukkan sex síðdegis til þess eins að skila bílnum í votta viðurvist. Sex tíma bið er ekki skemmtileg á neinum flugvelli þessa heims.
En það er ýmislegt sem við getum gert til að koma í veg fyrir vesen vegna þessa eða feita úttekt af kortinu vikum seinna.
Í fyrsta lagi lesa í þaula skilmála bílaleigna. Víst er það leiðinlegur andskoti en aðeins þannig kemstu að því hvort bílaleigan tekur svokallað „hold“ á kortinu þínu. Hold er það kallað þegar bílaleiga og oft hótel líka, festir sér mun hærri upphæð af kortinu sem bókað er með en gjaldið sem um ræðir. Með öðrum orðum þá tileinkar bílaleiga sér til dæmis 120 þúsund króna heimild á kortinu þínu þótt leigan á bílnum sé kannski aðeins 70 þúsund alls. Það gera þær til að geta tekið meira af kortinu síðar ef bílnum er skilað skemmdum eða sektir koma í ljós síðar. Lögfræðilega er þetta „hold“ vægast sagt á veikum grunni en þetta er samt raunin mjög víða og þetta yfirleitt auðvelt að sjá í heimabanka ef leitað er eftir.
Sé þörf á að skila bíl eftir lokun er bráðnauðsynlegt að taka myndir. Hvort sem þú notar myndavél eða snjallsíma skaltu mynda tíkina bak og fyrir við skil á bílastæðinu. Ekki hundrað prósent aðferð en fari svo að bílaleigan geri frekari kröfur síðar ertu að minnsta kosti með myndefni til að vefengja kröfur vegna skemmda.
Einhver gæti haldið að allar þessar no-name bílaleigur séu kannski verstar hvað viðkemur að reyna að hala fleiri seðlum út úr viðskiptavinum. Það ekki algilt. Smærri aðilar VERÐA að standa sig betur en þessir stóru til að eiga breik og sýna oft mun meiri lit en þessir stærri. Eins og við höfum fjallað um eru risastórar bílaleigur vestanhafs til dæmis oft með tóm leiðindi eftirá. Þekkt merki er ekki endilega ávísun á sanngirni. Trixið er að vera með þitt á hreinu við upphaf leigu og þitt á hreinu við skil.
Góða ferð 🙂
