Því fer fjarri að slökkvilið Sandgerðisbæjar fari með brunavarnir á Keflavíkurflugvelli og enn síður er öryggi flugfarþega á vellinum ógnað fremur en verið hefur.
Flugöryggi fólks á engan hátt ógnað eins og staðhæft var í sjónvarpsþætti á ÍNN í sumar
Sjónvarpsstjórinn Ingvi Hrafn Jónsson, fullyrti í þætti sínum á ÍNN fyrr í sumar að brunaöryggismál á Keflavíkurflugvelli væru í algjörum lamasessi og öryggi fólks væri þar beinlínis ógnað. Vísaði hann til öruggra heimildarmanna sinna sem staðhæfðu að slökkvilið Sandgerðisbæjar færi þar með allar brunavarnir á vellinum og það slökkvilið væri bæði lítið og óþjálfað.
Ritstjórn Fararheill hefur um tíma reynt að grafast fyrir um hvað sé rétt og hvað sé rangt í staðhæfingum sjónvarpsstjórans. Niðurstaðan er að Ingvi Hrafn fer með að mestu með staðlausa stafi að sögn þriggja heimildarmanna sem þó vilja ekki koma fram undir nafni. Tveir þeirra starfa á vellinum við brunavarnir.
Í fyrsta lagi fer slökkvilið Sandgerðisbæjar ekki með brunavarnir á Keflavíkurflugvelli heldur Brunavarnir Suðurnesja. Sú stofnun fer þó einungis með brunavarnir í byggingum á vellinum. Engin breyting hefur orðið á að sérstakt flugvallarslökkvilið er enn til staðar þar að auki. Það slökkvilið heyrir undir Isavia.
Brunavarnir Suðurnesja hafa mikla reynslu og öðlast mikla þjálfun í brunavörnum enda atvinnuslökkvilið og starfsmenn þess fengið mikla verklega þjálfun á vellinum og tekið þátt í ýmsum æfingum í samstarfi við flugvallarslökkviliðið sjálft.
Eina byggingin þar sem fjöldi fólks kemur saman á vellinum er í Leifsstöð, eða Flugstöð Leifs Eiríkssonar, þar sem útgönguleiðir eru margar og greiðar. Þar er fólk starfandi allan sólarhringinn alla daga ársins og bæði eldvarnarkerfi hússins mjög fullkomið og eldvarnareftirlit þar mikið. Það hefur ekkert breyst.
Það er því lítið nema hræðsluáróður sjónvarpsstjórans að æða fram með fullyrðingar um minna flugöryggi farþega í Keflavík. Setja má spurningarmerki við að hluti starfsmanna BS eru ekki menntaðir slökkviliðsmenn en það kemur flugöryggi fólks ekkert við.
