V art hefur farið framhjá ferðalöngum að Spánn er hægt og bítandi að verða dýrari og dýrari áfangastaður. Ekki einungis er flug og gisting að hækka árlega heldur og verðlag í landinu og þá allra mest í vinsælustu borgunum, Madríd og Barcelóna.
Er hugmyndin að kaupa eitthvað dýrt á Spáni? Fáðu þá vaskinn endurgreiddann við brottför. Mynd Tokyographer
Það er því full ástæða til að gefa ekkert aukalega þegar haldið er heim á leið og ein leið til þess er að nýta sér endurgreiðslu á virðisaukaskatti við brottför.
Vaskendurgreiðsla kemur til um leið og keypt er fyrir hærri upphæð á einum og sama staðnum en 91 evru eða sem nemur rétt tæpum 14.000 krónum miðað við gengið.
Virðisauki á Spáni, I.V.A. (impuesto sobre el valor anadido), er settur á velflestar vörur og þjónustu en í misháum mæli þó. Almennt eru þó vörur aðrar en matur og nauðsynjar í 21 prósenta vask-flokki.
Vissulega er þetta örlítið vesen en máltækið segir jú að þolinmæði þrautir vinni. Biðja þarf starfsfólk í verslunum um sérstök eyðublöð til að fá skattinn endurgreiddann og fylla þau eyðublöð út á staðnum. Í þokkabót þá verður varan/vörurnar að vera í upprunalegum umbúðum og helst ónotaðar þegar farið er á flugvöllinn því áður en nokkuð fæst endurgreitt þarf að fá sérstakan stimpil hjá tollþjónustu Guardia Civil á flugvöllunum. Básar þeirra eru á öllum flugvöllum og opnir allan sólarhringinn þó bið geti verið löng enda Guardia Civil hvorki þekkt fyrir lipra né vinsamlega þjónustu. Þar þarf að framvísa ekki aðeins vegabréfi og eyðublöðunum umræddu heldur og í tilfellum sýna vöruna/vörurnar sem um ræðir. Hér skal hafa í huga að í mörgum tilfellum eru básar þessir inni í flugstöðinni og því fæst ekki neitt ef varan/vörurnar hafa farið ofan í töskurnar sem tékkaðar hafa verið inn.
Að síðustu, gangi allt að óskum, er málið að fara rakleitt í næsta bankaútibú eða útibú Global Blue á vellinum og fá beinharða peninga til baka. Einnig er mögulegt að senda eyðublöðin í pósti eftir að heim er komið en þá tekur við bið.
Allt þetta vesen er vitaskuld aðeins sniðugt ef um dýra vöru er að ræða sem einnig er auðvelt að setja í handfarangur eða bera á sér. En 100 þúsund króna Breitling karlmannsúrið fer niður í 80 þúsund krónur með slíkri endurgreiðslu og um leið undir leyfilegt hámarksvirði hluta sem koma með má heim til Íslands án þess að greiða sérstakan aukatoll. Þá er vesenið farið að borga sig 😉
