Casablanca

Bara ef Humphrey Bogart og Ingrid Bergman væru enn bullandi ástfangin á Rick´s Cafe þar sem flóttamenn og nasistar héldu til og líf var í tuskum. Þá væri borgin Casablanca í Marokkó sannarlega mikið skemmtilegri en hún er í raun. Fyrir utan náttúrulega að kvikmyndin fræga var aldrei tekin í samnefndri borg.

Fátt er auðveldara en heimsækja borgina Casablanca í Marokkó full af yndislegum og ekki síður rómantískum hugmyndum um borgina. Það eru jú ekki margir sem ekki hafa séð kvikmyndina sem eftir borginni heitir og þótti á sínum tíma draga upp allbærilega mynd af borgarlífinu. Var enda Marokkó, sem þá heyrði undir hertekið Frakkland, og Casablanca sérstaklega, áfangastaður fjölmargra njósnara og hingað komu líka vel haldnir flóttamenn víða að.

Þeir hinir sömu eiga eftir að verða fyrir verulegum vonbrigðum. Ekki er tangur né tetur eftir af Casablanca eins og hún var í Seinna stríðinu og fjarri því eins mikil heimsborg og þá þótt vissulega sé borgin ekkert afdalakot heldur.

Hér eru miklir peningar enda Casablanca efnahagsleg miðstöð Marokkó og jafnframt stærsta borg landsins en hér búa rúmlega fjórar milljónir manna. Hér er ansi margt öðruvísi en annars staðar í landinu og það kemur mörgum á óvart hvað ungir menn eru hér grófir í garð kvenna. Hér reyna ungir og myndarlegir heimamenn hiklaust við konur á götum úti en víðast annars staðar í ríki múslima yrði slíkt litið afar alvarlegum augum.

En peningar kaupa fátt annað en glæsilegar byggingar en gera borg ekki sérstaklega skemmtilega. Að því komast flestir sem til Casablanca koma þessi dægrin. Hún á vissulega nokkra spretti en almennt séð er Casablanca leiðinleg heimsóknar og mun síðri kostur en Fes, Tangier eða Marrakesh svo aðrar merkilegar borgir landsins séu nefndar.

Sumir spyrja hvers vegna borg í Marokkó ber spænskt nafn en ástæða þess er sú að það voru Spánverjar sem fyrstir sáu hversu vel Casablanca lá fyrir viðskipti. Þeir byggðu fyrstu höfnina hér en höfnin sú er í dag stærsta manngerða höfn heims.

Almennt er vandræðalítið að vandra hér um og fátt sem komið getur Íslendingum í opna skjöldu. Þó getur áreiti sölumanna verið töluvert og eins skal hafa í huga að franska og arabíska eru helstu mál frumbyggja og fjandi erfitt getur verið að bjarga sér á ensku á mörgum stöðum utan hótela og helstu ferðamannastaða.

Loftslag og ljúflegheit

Ólíkt til að mynda Marrakesh inni í miðju landi er loftslag og hiti í Casablanca æði fínn og sjaldan of mikill. Skýrist það af sömu vindum og straumum og kæla Kanaríeyjarnar spænsku. Meðalhiti í júlí í Casablanca er þannig tæp 23 stig og hitastig fer vart niður fyrir 12 stig í desember. Vandfundnir þeir Íslendingar sem setja út á slík yndislegheit.

Til og frá

Engum þarf að koma á óvart að flugvöllur Casablanca er sá langflottasti í landinu og þótt víðar væri leitað. Mohammed V alþjóðaflugvöllurinn er í 30 kílómetra fjarlægð frá borginni til suðurs.

Fljótlegast er að taka leigubíla fyrir utan flugstöðina. Þeir eru 25 til 30 mínútur inn í miðborg Casablanca. Fái leigubílstjórarnir að ráða þarf að punga út rúmum fjögur þúsund krónum fyrir rúntinn aðra leiðina plús farangursgjald en hér verður fólk að standa í lappirnir og prútta. Eðlilegt verð þessa leiðina er um þrjú þúsund krónur og sé mjög rólegt er hægt að prútta prísinn niður í 2.500 krónur.

Að mörgu leyti er einfaldara að taka lest sem fer frá flugvellinum inn í miðborgina en sú fer aðeins einu sinni á klukkustund og því getur þurft að bíða nokkuð. Lestin keyrir bæði daga og nætur. Stakt far aðra leiðina kostar 550 krónur og rúnturinn tekur rétt rúmar 30 mínútur. Hún fer þó aðeins að Casablanca Voyageurs stöðinni sem er í úthverfi borgarinnar og þaðan þarf að taka leigubíl í miðborgina.

Rútur fara líka á milli og aka alla leið niður í miðborgina þar sem hótelin eru flest staðsett. CTM heitir fyrirtækið að baki þeim rútum en aksturinn tekur þó heila klukkustund. Prís á mann aðra leiðina er 800 krónur.

Samgöngur og snatterí

Öllu skiptir hvað þig langar að gera hvort þú ákveður að leigja bílaleigubíl, skottast með strætisvögnum eða bara taka leigubíla þegar á þarf að halda.

Síðastnefndi kosturinn er líkast til sá besti upp á að skoða borgina. Hún er jú stór og dreifð en að sama skapi er ekki stór hluti hennar verður skoðunar. Bílaleigubíll er sæmilegur kostur en umferðin er mikil og tiltölulega erfið nýliðum og í þokkabót er verðlag hér hátt og bílaleiga þar meðtalin. Hafa skal í huga að akir þú út fyrir borgina er takmarkað úrval af bensínstöðvum utan borgarmarkanna.

Söfn og sjónarspil

> Moska Hassan konungs II (Hassan II Mosque) – Önnur af aðeins tveimur moskum í öllu landinu sem opnar eru öðrum en strangtrúuðum er þessi mikla moska Hassans konungs en sú er meðal þeirra stærstu í veröldinni. Ekki nóg með það heldur státar hún af hæsta bænaturni heims sem nær 210 metra upp í himinn. Byggingin er æði fögur og mikilfengleg enda ekkert til sparað að gera hana sem best úr garði en moskan er tiltölulega nýleg. Sjálfsagt að taka frá tvær til þrjár klukkustundir og njóta og ekki síður er gaman að koma hér að kvöldi til en kastari beinir ljósi héðan í átt til Mekka öllum stundum. Skipulagðar skoðunarferðir farnar fjórum sinnum hvern einasta dag og það er eina leið annarra en múslima að skoða innandyra. Sidi Mohammed Ben Abdallah breiðgata. Aðgangseyrir 1.400 krónur.

> Corniche (Corniche) – Rétt vestur af moskunni miklu er hverfið Corniche sem er í sjálfu sér lítt merkilegt nema fyrir þá sök að um tíma var þetta heitasta strönd landsins og hingað komu allir sem eitthvað voru merkilegir í hinum vestræna heimi. Þar eru raðir af hótelum sem séð hafa betri daga og forvitnilegt er að skoða og ekki síður mynda.

> Markaðurinn (Medina) – Sé fólk að koma á arabískan markað í fyrsta skipti getur verið hugljómun að rölta um gamla markaðinn. Sá er umkringdur veggjum á alla kanta og ýmislegt þar að sjá og fá. Þessi markaður er þó hjóm eitt samanborið við alvöru markaði á borð við þá í Marrakesh og Fes.

> Helgistaður Sidi Abderrahman (Shrine of Sidi Abderrahman) – Töluvert vestar við ströndina en Corniche má líta augum helgistað einn byggðan á litlum kletti úti í sjó. Þar efst er helgistaður sem er þó lokaður öðrum en múslimum. Hingað er aðeins komist á fjöru án þess að blotna og staðurinn góður til myndatöku.

Til umhugsunar: Allmargir staðir eru hér góðir til myndatöku en hafa skal í huga að sé verið að mynda fólk taka fáir vel í það nema fá greitt fyrir. Listamenn á götum úti eru sérstaklega erfiðir hvað þetta varðar. Spyrja skal leyfis og gera ávallt ráð fyrir að þurfa að borga fyrir herlegheitin.

> Sacre Coeur dómkirkjan (Sacre Coeur Cathedral) – Þessi stóra dómkirkja í hjarta Casablanca vekur töluverða athygli þó óhrjáleg sé orðin. Hún var byggða á nýlendutíma 1930 þegar Frakkar réðu hér ríkjum og Rick rak enn kaffihúsið sitt en hefur frá sjálfstæði Marokkó 1957 að mestu staðið auð og yfirgefin. Í dag er hún notuð til ráðstefnuhalds en er opin þeim er kíkja vilja inn og skoða. Hún er þó mun glæsilegri utanfrá en innan. Kirkjan stendur við Parc de la Ligue Arabe og er auðfundin. Aðgangur frír.

> Torg Múhammeðs V (Mohammed V Square) – Rétt suður af torgi Sameinuðu þjóðanna er að finna þetta glæsilegasta torg borgarinnar. Upplýstir gosbrunnar í tugatali skreyta torgið sem er tileinkað manninum sem byggði höfn borgarinnar.

Annað áhugavert

Sjálfsagt er fyrir gesti að rúlla sér í tyrkeskt baðhús og láta gæla við líkama og sál. Hér sem annars staðar í Marokkó eru margir slíkir staðir en ekki allir jafn yndislegir. Eitt baðhús sem þykir sérstaklega yndislegt og framúrstefnulegt þar sem það er rekið í þágu einstæðra mæðra í landinu er Solidarite Feminine við Ahmed Chowki strætið.

Þá er hér stærsta manngerða höfn heims en deila má um hvort hún sé verð skoðunar. Hægt er að gera leiðinlegri hluti en það tekur tíma.

Verslun og viðskipti

Casablanca er ekki staður til að versla mikið. Markaðurinn er í dapurlegri kantinum þó þar megi finna ýmislegt forvitnilegt. Hér er nóg af nýtísku verslunum og margar af þeim frægari eru hér líka en verðlagið mjög hátt miðað við Marokkó og sjaldan hægt að gera hér kaup sem ekki er hægt að gera í borgum Evrópu.

Glingur af ýmsi tagi finnst á markaðnum, Medina, og götusalar margir bjóða slíkar vörur líka þó deila megi um gæðin. Vilja fólk finna hefðbundnar vestrænar verslanir finnast þær í hnöppum í Maarif hverfinu.

Vilji fólk fá nett stuð skal halda til Derb Ghraleef hverfisins. Það er afar fátækt hverfi en fjöldi kompusala sem selja allt milli himins og jarðar þó mestallt sé hið mesta drasl. Fín krydd er þó hægt að fá hér og matsölustaðir eru hér fjölmargir þó fæstum af Fróni muni lítast vel á þá staði. Þeir eru þó ágætir svo lengi sem þess er gætt að maturinn sé vel eldaður. Í öllu falli er ódýrt bæði að versla hér og borða en aðeins að því gefnu að fólk þori að prútta og prútta hart.

Matur og mjöður

Enginn skortur er á betri veitingastöðum hér í borg og finnst þar allt frá kjúklingasölum á götum úti til fokdýrra evrópskra staða með meistarakokka í eldhúsinu. Það er eitt sem tekist hefur að nokkru leyti að halda í frá dögum Frakka hér í landi sem eru ekki vanir að láta bjóða sér hvað sem er.

Mest úrval betri staða má finna í og við Burgundy, Gauthier og Racine hverfum en margir þeirra eru á vegum hótela. Á þessum vef má lesa nánar um alla helstu veitingastaði borgarinnar.

Til umhugsunar: Veitingastaðir almennt í Marokkó opna tiltölulega seint á kvöldin og því koma flestir að lokuðum dyrum ætli menn að fá sér bita fyrir 19 á kvöldin eða svo. Hér borða margir ekki fyrr en uppúr klukkan 21.

Áfengi fæst víða og sérstaklega á vestrænum hótelum og veitingastöðum. Minnst tvær matvöruverslanir, Acima og Marjane, selja áfengi þó úrval af bjór sé mjög takmarkað.

Djamm og djúserí

Vel er hægt að sprikla á klúbbum og börum hér sem nóg er af líka þó hlutfall karlmanna á börum borgarinnar sé helst til mikið eða kringum 80 prósent. Barir finnast víða en flestir í grennd við hótelin.

Líf og limir

Almennt er fólkið í Marokkó yndislegt og margir sýna ferðafólki sem öðrum bæði kurteisi og hjálpsemi. Hér í borg tala þó tiltölulega fáir ensku og því mun betra ef gestir eru talandi á frönsku sem allir skilja.

Eitthvað er um áreiti hér og verst er það á markaðnum og við moskuna miklu. Þá er óráð að rölta mikið um eftir miðnætti. Leigubílstjórar reyna allir sem einn að smyrja ofan á verð. Prútta skal af hörku og hafa bein í nefi. Forvitnast á hótelinu hvað kosti að fara hingað og þangað og hafa það til viðmiðunar. Konur ættu að varast að vera mjög fáklæddar eða sýna mikið hold. Það kallar á hróp og köll á götum úti og getur orðið til að meina þeim aðgengi að stöku stöðum.