Þrátt fyrir stóraukið eftirlit og öryggisgæslu hin síðari ár þurfa hryðjuverkamenn framtíðarinnar líklega ekki að eyða mánuðum eða jafnvel árum að undirbúa rán á farþegaþotum. Það gæti nægt að vera vel að sér í kóðun og tölvufærni.
Tölvur á tölvur ofan í flugstjórnarklefa Airbus þotu.
Sért þú flughrædd/ur er kannski ástæða til að hætta lestrinum og henda sér yfir í léttmetið á Bleikt.is. Það gæti nefninlega lítið hjálpað að vita að tölvurefir geti í framtíðinni rænt heilu farþegaþotunum í rólegheitum heima hjá sér.
Lítið fer fyrir þeirri umræðu enn sem komið er en raunin er sú að tækniframfarir í flugvélaiðnaði eru ekki síður miklar en í öðrum geirum. Vel yfir 200 tölvukubbar finnast í allra nýjustu bifreiðum og þá tölu má margfalda þegar kemur að allra nýjustu þotum. Þar er fátt orðið sem ekki er stýrt með tölvum með einum eða öðrum hætti. Þær tölvur, ekki síður en aðrar, geta hakkarar brotist inn í sé illur vilji fyrir hendi.
Þegar hefur verið sýnt fram á að þetta sé fræðilega hægt. Það gerði öryggissérfræðingur á frægum fundi í Amsterdam fyrir tveimur árum og vakti töluverða athygli. Og þeim fjölgar sem nú vara við litlum vörnum gegn hökkurum. Nú síðast rithöfundurinn og öryggisfræðingurinn Marc Goodman í bók sinni Future Crime.
Þarf þó kannski ekki sérfræðinga til. Skammt er síðan fréttaþátturinn 60 Minutes sýndi fram á hversu auðvelt er að hakka inn í tölvukerfi nýs bíls. Hakkarinn gat bremsað og gefið í að vild án þess að ökumaður fengi neitt við ráðið.
Þá voru þeir nokkrir sem skutu þessari ástæðu á loft sem hugsanlegri ástæðu hins stórundarlega flugs og brotlendingu vélar Malaysian Airlines sem enn er leitað að á Indlandshafi.
Góðu fréttirnar helst þær að loftferðastofnanir vita af vandanum og flugframleiðendur sömuleiðis. Kannski verða farþegavélar gerðar hakkheldar á endanum ef það er á annað borð hægt.
