Fituskattur á flugfarþega hefur farið miður niður hjá fjölmörgum lesendum Fararheill. Við bara fengið ein 30 hatursskeyti síðasta sólarhringinn plús þessi hefðbundnu fimmtíu aflæk þegar við skrifum eitthvað umdeilt. En við bökkum ekkert. Fituskattur á flugfarþega er líklega gáfulegasti aukakostnaður sem flugfélög geta mögulega sett á.
Fituskattur á farþega er sérdeilis góð leið til að minnka mengun og koma fólki í form um leið.
Hvers vegna það kannt þú að spyrja.
Jú, fyrir því nokkrar ástæður en þar kannski helstar og bestar að við erum þegar skylduð til að greiða x aukalega fyrir alls kyns farangur og þar ávallt miðað við þyngd. Ef handfarangurinn er 14 kíló en ekki 12 kíló þá þarftu að greiða aukalegt gjald fyrir. Ef innritaða taskan er 23 kíló en ekki 20 kíló þá þarftu að greiða aukalega hjá velflestum flugfélögum heims. Og það duglega yfirleitt.
Ofangreint er hrein og bein mismunun þegar haft er í huga að 55 kílóa manneskja þarf að greiða það sama fyrir of þunga tösku og einstaklingur sem vegur 100 kíló. Sú fyrrnefnda ætti, að öllu eðlilegu, að geta tekið með sér TVÆR 20 kílóa töskur kostnaðarlaust miðað við þá síðarnefndu.
En burtséð frá grófri mismunun eru tvær aðrar brilljant ástæður fyrir að farþegar greiði flug eftir þyngd. Farþegaþotur geta aðeins flogið undir tilteknum þyngdarmörkum og þess vegna skjóta flugfélög gróflega á þyngd farþega við hvert flug. Þau reikna það mjög gróft í plús til að öryggis sé gætt og miðað við þann útreikning þarf rellan að taka x-mikið eldsneyti til að komast alla leið. Yfirleitt mun meira eldsneyti en vélin þarf því gera þarf ráð fyrir veðri, vindum og hugsanlegum töfum á stærri flugvöllum.
Það aftur merkir að flugið er dýrara en ella fyrir alla. Það er gert ráð fyrir fullum tönkum af eldsneyti þegar þrír,fjórðu myndu sennilega duga til eingöngu vegna þess að gert er ráð fyrir að farþegir vegi x-mikið. Vélin því mun þyngri á flugi og eyðir meira eldsneyti fyrir vikið.
Það aftur þýðir að rellurnar menga mun meira en þörf er á. Ef farþegar væru vigtaðir og greiddu fyrir þyngd sína eins og farangur gætu flugstjórar vitað upp á hár hversu mikið eldsneyti þyrfti tiltekna leið, flogið þangað hraðar og mengun yrði minni en við núverandi aðstæður.
Minni mengun er príma mál enda við öll að anda að okkur óhreinu lofti nánast hvarvetna í heiminum og slíkt myndi ríma vel við loftslagsmarkmið Sameinuðu þjóðanna. En slíkur fituskattur gæti líka mögulega komið ólíklegasta fólki í betra form og til bættrar heilsu. Eða er ekki líklegt að þú kannski sleppir ábótinni á veitingastaðnum eða fjórða túrnum að grillinu ef þú veist að öll aukakílóin snarhækka flugfargjaldið til Tenerife?
Það, gott fólk, eru tvær flugur í einu höggi. Tómir plúsir við fituskatt 😉
