Það er hundrað prósent laust við að það geti kallast skemmtileg lífsreynsla að sitja í farþegaþotu sem missir annan hreyfilinn yfir miðju ballarhafi. Sem er það sem gerðist á sunnudaginn var þegar vél Icelandair frá Glasgow til Íslands var snúið við eftir hálftíma flug.
Að gera góða hluti úr slæmu ástandi er tákn um góða þjónustu
Töluvert fór um farþega um borð þegar neyðarkall flugstjórans til flugturnsins í Glasgow heyrðist óvart yfir hátalarakerfi vélarinnar jafnvel þó enginn hefði í raun orðið var við að annar hreyfillinn hefði farið.
Góðu heilli gekk allt vel á bakaleiðinni og lendingin jafn tíðindalaus og Fréttablaðið á mánudegi.
Það sem Fararheill vildi hins vegar koma á framfæri voru prýðileg viðbrögð flugfélagsins eftir lendinguna.
Oft höfum við gagnrýnt Icelandair fyrir að koma miður fram við viðskiptavini en í þessu tilfelli var fólk vart fyrr komið út úr vélinni en ekið var rakleitt á gott hótel þar sem fulldekkað hlaðborð beið fólks. Í þokkabót bauð flugfélagið farþegum öllum gjafabréf þegar farþegar loks komust um borð að nýju.
Við viljum ómögulega setja okkur á háan hest hér hjá Fararheill en slík viðbrögð eru einmitt það sem við höfum bent ferðaþjónustuaðilum á að er allra, allra, allra besta auglýsing hvers fyrirtækis. Með því að gera gott úr slæmu, jafnvel þó það kosti fyrirtækið tíma og peninga, ætti að skila sér í því að allir sem um borð voru í þetta skiptið hika ekki við að fljúga aftur með Icelandair og bera fyrirtækinu góða sögu þegar heim er komið.
Beisik stöff.
