Hugsum okkur stöðu. Fimm mínútum áður en þú ferð í flug frá París til Toronto færðu orðsendingu frá Icelandair þess efnis að tengifluginu þínu frá Íslandi hafi verið aflýst.
Þú gætir hringt hið snarasta og beðið minnst klukkustund eftir svari og jafnvel töluvert lengur en það með feitum símakostnaði, eða þú gætir farið að ráðum Icelandair og haft samband gegnum samfélagsmiðla eins og facebook eða twitter. Ef um akút mál er að ræða ætti flugfélagið að geta haft samband á mínútum eða klukkustundum í versta falli.
En ekki margríkisstyrkt Icelandair.
Það fyrirtæki tekur sér þessi dægrin upp undir TÓLF DAGA að svara örvæntingarfullum viðskiptavinum á samfélagsmiðlum. Sem segir sig sjálft að hjálpar viðskiptavinum ekki nokkurn skapaðan hlut enda skeytin fljótari að berast með farskipum og bréfdúfum.
Með öðrum orðum; viðskiptavinir mega nokkuð eiga sig bara af hálfa Boga Nils Bogasonar og félaga hjá flugfélaginu.
Dæmi um þetta má sjá á meðfylgjandi skjáskotum hér að ofan og til hliðar og dæmin eru mun fleiri á samfélagsmiðlum. Þar sést glögglega að allnokkrir viðskiptavinir voru í stressi og töluverðum vandræðum þann 18. september. Flugfélagið hins vegar ELLEFU DAGA til að gera svo mikið sem svara og jafnvel þá eru svörin mikið til yfirborðskennd þvæla.
Hér skal líka hafa hugfast að þessi dæmi eru ekki einsdæmi á neinn mælikvarða. Þetta er algengt og það merkir að ef eitthvað bjátar á fyrir flug, í flugi eða eftir flug með Icelandair þá skal ekki nokkur sála búast við aðstoð fyrr en eftir dúk og haugdrullugan disk og þá yfirleitt mörgum sólarhringum of seint.
Kannski við ættum að fljúga meira út og heim með Play, easyJet, Lufthansa, British Airways, Wizz Air, SAS, Greenland Air, Neon, Delta eða Atlantic Airways.
Hvers vegna þeim? Jú, öll svara angistarfullum skeytum á samfélagsmiðlum töluvert fljótar en Icelandair. Mörgum sólarhringum fljótar þó öll sinni mun fleiri farþegum en Icelandair svona dags daglega.
Bara svona hugmynd ef einhvern tímann eitthvað kemur upp á og þig dreymir um aðstoð…
