Vafalítið hafa margir skemmt sér yfir fregn fyrr í vikunni þess efnis að farþega í Leifsstöð hafi verið meinað að fljúga eftir að viðkomandi klæddi sig í átta buxur og tíu peysur til að koma í veg fyrir að þurfa að greiða sérstakt farangursgjald. Skondið vissulega en hér hangir ýmislegt á spýtu.
Frá Leifsstöð. Þar virðist eitt gilda fyrir Jón og annað fyrir séra Jón. Mynd Brendon Goodmurphy
Bæði mbl og rúv gerðu málinu skil með hefðbundinni fagmennsku; báðir fjölmiðlar birta óbreytta fréttatilkynningu frá lögreglu og bæta ekki staf við þó hver meðalgreind manneskja geri sér ljóst að grundvallarspurning vaknar við tíðindin.
Skoðum fyrst „fréttina“ sjálfa:
Maður var handtekinn í Flugstöð Leifs Eiríkssonar á dögunum eftir að hafa tekið bræðiskast því hann mátti ekki vera klæddur í mörg lög af fötum í flugvél. Til að komast hjá því að greiða innritunargjald fyrir töskuna sína hafði maðurinn gripið til þess ráðs að klæða sig í átta buxur og tíu boli eða peysur úr töskunni sinni. Honum var vísað frá flugi og gerð grein fyrir því að hann gæti skapað hættu fyrir aðra farþega þar sem hann gæti tæpast hreyft sig þar sem hann væru svo dúðaður í fatnað. Þessu snöggreiddist maðurinn, sló í borð og lét öllum illum látum svo lögreglan á Suðurnesjum var kvödd á staðinn, sem endaði með handtöku.
Dabba dona!!! Það á auðvitað að gefa viðkomandi frían flugmiða og kampavín með fyrir að komast í átta buxur og tíu peysur og það væntanlega við innritunarborð í Leifsstöð. Satt er það að mörg okkar gætu sennilega troðið okkur í tíu peysur en að hoppa í ÁTTA buxur er ekki öllum gefið nema buxurnar hafi allar verið spandex.
Spurningar vakna við lesturinn:
A) Kunni viðkomandi ekki að lesa? Flestum er ljóst að allur farangur kostar aukalega hjá velflestum flugfélögum þessi dægrin og sú upphæð skiptir nokkrum þúsundköllum. Ekki hvað síst við innritunarborð þar sem kostnaður við töskudruslu er tvöfaldur á við að bóka slíkt við upprunalega bókun.
B) Misskildi viðkomandi hvað fellur undir handfarangur og hvað ekki? Það getur verið skiljanlegt. Wow Air sérstaklega hefur ítrekað breytt reglum um handfarangur og leyfilega þyngd og þar getur slíkt kostað fimm til átta þúsund krónur aukalega hvern fluglegg. Það alveg upphæð sem meðalmann munar um.
Við engu nær eftir fréttalesturinn. Enginn veit hvort þetta gerðist hjá íslensku flugfélögunum eða erlendum. Enginn reyndi að ná tali af „glæpamanninum“ í þessu tilviki. Hvers vegna reiddist viðkomandi svona mikið? Var viðkomandi undir áhrifum og í rugli eða bara sár og svekktur vegna græðgisgjalda?
Aðalspurningin hlýtur þó að vera hvers vegna viðkomandi var meinað að fljúga vegna þessa. ENGAR sérstakar reglur flugfélaganna Icelandair og Wow Air banna farþegum að klæða sig eins og þeir kjósa sjálfir enda væri slíkt skýlaust brot á mannréttindum.
Vissulega er einn staður um borð í farþegavélum þar sem dúðaðir, hrumir, þybbnir, aldnir eða fatlaðir einstaklingar mega ekki sitja og það er við neyðarútganga vélanna. Eðlilega enda þarf farþegi í slíku sæti að hafa hraðar hendur að opna neyðarútganginn og hjálpa öðrum út ef þörf krefur.
Annars staðar eru þó engar slíkar reglur miðað við upplýsingar á vefmiðlum íslensku flugfélaganna. Hvað með það þó farþegi sé dúðaður í átta buxur og tíu peysur. Víst takmarkar það hreyfigetu viðkomandi en hvernig það veldur HÆTTU fyrir aðra farþega? Það er fullt af fólki með skerta hreyfigetu sem fljúga með flugfélögunum vandræðalaust á hverjum degi. Fötluðu fólki er okkur vitandi ekki neitað um far með flugvélum. Margt fatlað fólk þó mjög hreyfiskert og ætti samkvæmt fréttinni að skapa HÆTTU fyrir aðra farþega. Sömu rök gilda um aldraða einstaklinga svo ekkert sé minnst á þann fjölda fólks sem er tugum kílóa yfir kjörþyngd. Fjölmargir offeitir einstaklingar eru með skerta hreyfigetu og ekki óalgengt að vitna flugfarþega sem ættu í bullandi vandræðum að komast út um neyðarútganga í hvelli. Þeir þá væntanlega líka að skapa HÆTTU fyrir aðra farþega.
Farþeginn umræddi, að því gefnu að hann/hún sé Íslendingur, ætti í öllu falli að prófa að sækja rétt sinn vegna atviksins. Líkurnar á sigri og bótum sýnast okkur æði góðar miðað við þær upplýsingar sem fyrir liggja.
