A lltaf annars lagið kemur upp sú staða að flugfélög misreikna þyngd véla sinna og verða að skilja innritaðan farangur fólks eftir áður en farið er í loftið. Hvað gera þeir sem fyrir verða þá?
Icelandair skildi töskur fjölda farþega eftir að ásettu ráði í vikunni. Hvaða rétt skapar það?
Þó hvergi séu réttindi flugfarþega eins sterk og í Evrópu er ekki neglt í stein í þeim lögum nákvæmlega hvaða bætur farþegar hvers töskur fylgja þeim ekki í flugi eiga rétt á. Það er mikið til undir hverju flugfélagi komið en ekki síður hversu farþegar standa fastir á sínu.
Til dæmis er ekki gerður raunverulegur greinarmunur á því hvort töskur einfaldlega týnast tímabundið í flugi eða hvort flugfélag ákveður að skilja töskur eftir sökum yfirþyngdar. Ganga má frá því sem vísu að sum flugfélög sem geyma farangur vegna of mikillar þyngdar nota aðra afsökun til að fela þann sannleik.
Flugfélög hafa mjög mismunandi háttinn á í tilfellum sem þessum. Sum greiða strax út peningaupphæð til að dekka þetta allra nauðsynlegasta þangað til farangurinn kemst í réttar hendur. Það er að segja ef viðkomandi er ekki í heimalandinu. Önnur flugfélög endurgreiða útlagðan kostnað sem rekja má til tafa á farangri eftirá. Sum yppta öxlum og benda farþegum á ferðatryggingar sínar.
Meginatriðið í slíkum málum er að tilkynna strax á flugvellinum við komu að töskurnar hafi ekki skilað sér. Gera það jafnvel þó flugfélagið sjálft hafi viðurkennt að hafa skilið farangurinn eftir. Fylla út þartilgerð eyðublöð, taka afrit og forvitnast hjá starfsmanni flugfélagsins hvort um einhverjar bætur sé að ræða strax. Fá uppgefið símanúmer eða netfang þeirra aðila sem sjá um farangursmál flugfélagsins og vona það besta.
Taka skal kvittanir fyrir öllum útgjöldum sem mögulega tengjast því að farangurinn þinn skilaði sér ekki burtséð frá því hvort flugfélagið lét þig hafa einhverja seðla eða ekki. Öll slík gögn þarf að nota ef í hart fer og ekki síst ef farangurinn skilar sér aldrei eins og gerist endrum og sinnum.
Fræðilega á flugfélag að koma töskum á hótel farþega þeim að kostnaðarlausu en það getur verið flókið þegar fólk er mikið á flakki og skiptir jafnvel um gistingu hvern einasta dag. Sumir gista jafnvel ekki á hótelum og það getur verið þrautin þyngri að koma farangri fólks á tjaldsvæði svo eitt dæmi sé tekið. Því lengur sem það tekur því meiri líkur á að málið verði bótaskylt.
Við alvarlegar tafir geta hugsanlegar bætur hoppað upp í rúmar 170 þúsund krónur en ef um dýra hluti er að ræða lendir bótakrafan oftar en ekki á tryggingafélög ef viðkomandi er með slíkt. Slíkt þarf undantekningarlaust að sanna og fólk þarf einhvern veginn að geta sýnt fram á og sannað að X dýrir hlutir hafi verið í farangri sem fór fjandans til.
Reynslan sýnir að flugfélögum er þvert um geð að greiða mikið fyrir þau óþægindi sem töskuhvarf hefur í för með sér. Því best að hafa sitt á þurru, skrá allt, geyma allt og standa fast á sínu. Ekki gleyma heldur að flugfélög hafa fimm sólarhringa til að finna farangurinn þinn og koma til þín án þess að til komi sérstakar bætur. Aðeins að þeim tíma loknum sem bótakrafa verður fýsileg en þá er líka orðið hæpið að farangurinn þinn finnist yfir höfuð.
Þá skal aldrei nokkurn tímann setja lyf eða annað bráðnauðsynlegt í innritaðan farangur. Hafðu allt slíkt á þér eða í handfarangri öllum stundum.
