Lengi vel höfum við hjá Fararheill bent forsvarsmönnum Wow Air á leiðir til að bæta þjónustu og koma fyrirtækinu í fremstu röð. Þó ekki sé okkur þakkað með öðru en hundsa fyrirspurnir og leiða okkur hjá sér hefur tillögum okkar undantekningarlítið verið hrint í framkvæmd. Nú erum við með enn eina tillöguna.
Aðeins mörgum dögum eftir langar tafir fá farþegar minnstu upplýsingar um hlutina. Skjáskot
Skúli Mogensen, eigandi og forstjóri Wow Air, hefur sennilega ekki hugmynd en flug í dag er töluvert frábrugðið því sem var.
Áður fyrr ferðaðist fólk sjaldnar og greiddi mun meira fyrir en fékk líka á móti töluvert betri þjónustu. Skotgekk að skjótast gegnum öryggisgæslu, langar raðir í innritun var hending en ekki regla, hægt var að leggja niður borð um borð án þess að það skærist inn í mallakút og starfsfólk fór ekki sex sinnum um ganga að selja glingur og gufu. Svo var ekkert vesen að taka með tösku eða töskur án þess að allt færi í háaloft eða veðsetja þyrfti blokkaríbúðina. Og þú veist nú hvað allt er dýrt á klakanum svo við verslum eins og enginn sé morgundagurinn þegar við förum eitthvað. Ergo: við þurfum töskur.
Kíkjum aðeins á meðfylgjandi skjáskot. Þar tjáir sig einstaklingur sem sat fastur á Kastrup í Kaupmannahöfn í sex stundir vegna ófyrirsjáanlegra tafa á flugi Wow Air. Sá skrifar þremur dögum eftir að heim er komið og engann þarf sérstakan saksóknara til að átta sig á að Wow Air brást öllum skyldum sínum meðan á biðinni stóð.
Lögum samkvæmt á að tilkynna farþegum um langar tafir. Sömuleiðir á að bjóða þeim að fljúga sína leið með öðrum flugfélögum ef kostur er á. Gera má ráð fyrir að það sé ótrúlega auðvelt á Kastrup enda tíðar ferðir þangað héðan og heim aftur. Síðast, en ekki síst, á að segja farþegum frá réttindum sínum.
Wow Air sleppti öllu ofantöldu í ofangreindu tilviki. Flugfélagið kom sem sagt svona fram við viðskiptavini sína:
♦ Farþegar látnir bíða lon og don án nokkurra útskýringa á Kastrup í fleiri klukkustundir
♦ Engar upplýsingar um lengd tafar né heldur fólki boðin hressing eða matur
♦ Engar upplýsingar um hugsanlegar bætur eða endurgreiðslu á ferð
♦ Farþegar eru svo úti á þekju að það þarf einn farþega af tæplega 200 til að skjóta forvitnisskeyti gegnum fésbók þremur dögum eftir tafir til að fá upplýsingar um nokkurn skapaðan hlut….
En Skúli, hefði ekki verið dálítið góð þjónusta að fara að lögum? Ekki viltu vera kallaður lögbrjótur?
Til dæmis hefði verið sniðugt að láta fólk vita meðan það beið að bilun hefði komið upp og bjóða genginu í mat og bjór.
Til dæmis hefði verið sniðugt að segja farþegum þínum að biðin yrði sennilega löng því þið vitið mætavel hversu langan tíma það tekur að kalla til aukavél og henda um borð. Vera hreinskilin með þetta bara.
Síðast hefði nú verið lágmark að bjóða fólki strax, og greiða strax, þær bætur sem Evrópulög kveða á um þegar sex tíma tafir verða á tæplega þriggja stunda flugi. Þú veist jafnvel og við hér hjá Fararheill að bilun í vél er 100% ávísun á bætur er það ekki? Í þessu tilviki eiga allir farþegar í þessu flugi inni hjá þér 36.700 krónur miðað við gengi dagsins.
Finnst þér gaman að svindla á viðskiptavinum þínum Skúli Mogensen? Ef ekki, hvers vegna ertu ekki þegar búinn að bjóðast til að greiða bætur að fyrra bragði? Þú veist þeir eiga rétt á því.
PS: Skúli, það ferðast miklu fleiri með flugfélagi þínu ef þú skerð þig úr frá öllum hinum skítaplebbunum og kemur hreint og beint fram við fólk. Sérstaklega þína eigin viðskiptavini. Nema þú viljir bæta „svikahrappur“ við starfslýsinguna þína.
