Í þau skipti sem Icelandair auglýsir flugferðir sínar til bandarísku borgarinnar Denver í Kolóradó er undantekningarlítið minnst á þá merku staðreynd að þar eru „300 sólskinsdagar á ári.“ Sem er að mestu innantóm steypa og markaðssetning.
Tóm della með 300 sólskinsdaga í Kolóradó. Skjáskot
Það hljómar hreint dásamlega: 300 dagar af sólskini! Slíkur fjöldi sólskinsdaga setur meira að segja Kanaríeyjarnar í feitan skugga.
Vissulega skín sólin mikið á Denver og Kolóradófylki allt og það skýrist af hluta af því að fylkið stendur afar hátt. Höfuðborgin Denver stendur til dæmis í yfir 1600 metra hæð yfir sjávarmáli og Klettafjöllin í grenndinni töluvert hærra en það. 1600 metrar, svona til að setja hlutina í samhengi, er svona sirkabát sama hæð og allra hæsti punktur Íslands.
En 300 daga sólskinstalan er að mestu ýkjur út í eitt. Icelandair þó fjarri því eitt um að plögga þá „staðreynd.“ Það gerir meira að segja ferðamálaráð Kolóradó.
Ástæðan er að á áttunda áratug síðustu aldar reiknaði veðurstofnun í fylkinu út að sólskins nyti rúmlega 300 daga á ári og færði til bókar. Gallinn þó sá að þá var enginn opinber mælistika fyrir sólskinsdaga og reyndar er ennþá deilt um hvað flokkist sem sólskinsdagur og hvað ekki hjá vísindastofnunum á heimsvísu.
Mælistikan sem Bandaríkjamennirnir notuðu í Kolóradó var að það sæist til sólar. Ef sólar naut í mínútur, korter, hálfa klukkustund eða heila klukkustund var það flokkað sem heill sólskinsdagur.
Nú leyfum við lesendum að reikna á eigin spýtur hvað það merkir. Nægir að segja að ef nokkrar mínútur nægðu dag hvern til að Veðurstofa Íslands færði „sólskinsdag“ til bókar væri Reykjavík töluverð sólskinsparadís líka 🙂
Nær lagi að nefna að Denver nýtur 150 heiðskýrra daga ár hvert að jafnaði. Þá daga yljar sólin alla daga. Hina dagana er annaðhvort þungskýjað eða hálfskýjað.
