Efalítið hefur það háð mörgum sem gjarnan vilja iðka skíðaíþróttina erlendis að þær ferðir sem alla jafna eru í boði frá Íslandi eru oftar en ekki til vinsælla en jafnframt dýrra áfangastaða. Dýru staðirnir eðli málsins samkvæmt bjóða jafnan upp á meira úrval afþreyingar auk betri hótela en þegar aðalatriðið er að komast í stórkostlegan púðursnjó með fjölskylduna og peningar skipta máli eru til betri kostir.

• Cervinia, Valle d´Aosta, Ítalíu

Hér er kjaftfullt af fólki þegar aðstæður eru bestar en munurinn hér og annars staðar sá að hér eru venjulegar ítalskar fjölskyldur að leika sér ólíkt því sem gerist á dýrari skíðastöðum þar sem erlent ferðafólk er í meirihluta. Þó raðir í lyfturnar séu lengri þá er hér jafnvel meira gaman sökum þess að hér eru fjöldi barna og læti og óp í öllum hlíðum. Dálítið eins og í Bláfjöllum þegar nægur snjór er og sól skín í heiði. Þá eru brekkur Cervinia alls ekki verri en á dýrari stöðum en verðlag er 25 prósent lægra en á  sambærilegum stað í Sviss eða Austurríki. Heimasíðan.

• Brides Les Baines, Tres Vallois, Frakkland

Þessi ágæti bær er á kortinu fyrir tvennt. Frábærum heilsulindum og einhverju billegasta skíðasvæði í Ölpunum öllum. Bærinn lítill og vinalegur og með einum kláfi er komist upp í Þriggja dala skíðasvæðið sem þykir eitt það allra besta og fjölbreyttasta í Frakklandi og þótt víðar væri leitað. Hér er verðlag hvað skíðaiðkun varðar allt að 30 prósent ódýrara en annars staðar. Heimasíðan.

• Bohinj, Bohinj, Slóvenía

Ódýr og góður skíðastaður í einu ódýrasta landi Evrópu. Engin fimm stjörnu hótel hér enn sem komið er en kósí kot og smærri fjölskylduhótel í grenndinni. Afskaplega fallegt svæði og fjöldi lyfta og brekkur góðar til að njóta skíðaíþrótta út í ystu æsar án þess að tæma veskið til þess. Verðlag um 50 prósent ódýrara en í Sviss, Austurríki eða á Ítalíu. Heimasíðan.