Nú er lag að verða sér úti um ansi dægilega haustferð og njóta sólar og sérþjónustu í október á grísku eynni Korfu í vikustund og það niður undir 80 þúsund krónur á mann.
Breska ferðaskrifstofan Broadway Travel hefur slegið nokkuð af tilteknum ferðum sínum frá Bretlandi til Korfu í þeim mánuði en í þeim er dvalist á fjögurra stjörnu hóteli með öllu inniföldu í Nissaki fyrir rétt rúmar 57 þúsund krónur á haus miðað við tvo. Hlaupi fólk til og bóki líka flug út og heim aftur nú meðan Wow Air er að bjóða slíkt niður í tíu þúsund krónur hvora leið er hægt að sleikja gríska sól í töluverðum lúxus fyrir 80 þúsund krónur.
Rúsínan í þessum pylsuenda er annars vegar að þessar ferðir eru í boði frá allnokkrum flugvöllum Bretlandseyja og hins vegar að í boði er að næla sér í betra og stærra herbergi sé það til á annað borð án aukagjalds. Þá eru innifaldar ferðir til og frá flugvelli líka.
Tilvalið að bjóða sjálfum sér og makanum upp á eitthvað notalegt og búa sig andlega undir veturinn hér heima brún á hörund og með bros á vör.