Tvö hundruð og áttatíu krónur duga skammt í lífinu. Á farsæla Fróni kemst enginn í strætó eða sund fyrir þann pening. Góðu heilli dugar þessi upphæð þó fyrir glasi af tíu ára gömlu Rioja víni á bar í höfuðborg Rioja héraðs.

Laurel gata í Logrono er þekkt um allan Spán. Þar eru á litlum bletti ellefu tapas- og rauðvínsbarir hver öðrum betri. Mynd Francisco Martinez
Laurel gata í Logrono er þekkt um allan Spán. Þar eru á litlum bletti ellefu tapas- og rauðvínsbarir hver öðrum betri. Mynd Francisco Martinez

Það er ekkert nýtt að um allan Spán má finna tiltölulega ódýr vín á börum ekki síður en bjóra eða annað alkóhól. En oft, og yfirleitt alltaf á strandstöðum, fást aðeins hræbilleg borðvín frá alls dapurlegum vínhéruðum þegar pantað er hvítt eða rautt.

En í höfuðborg Rioja héraðs, Logroño, er sannarlega almennt hellt frábæru víni í glös sé slíkt pantað. Enginn kráareigandi vill vera þekktur fyrir annað en bjóða góðan mjöð og það helst beint af næstu ekrum.

Það fer reyndar töluvert eftir börum hver prísinn og ekki síður hvaða vín er um að ræða en svo virðist sem engum þar í bæ detti í hug að bjóða ferðafólki neitt annað en góð og tiltölulega gömul vín sem renna ljúflegar niður en vatnssopi í Sahara.

Calle del Laurel er fremst jafningja þegar kemur að eðalgötum í Logroño sem er í rúmlega þriggja stunda fjarlægð frá Madríd og fjögurra stunda fjarlægð frá Barcelóna. Á Laurel götu finnst nánast ekkert nema rauðvínsbarir, smáréttabarir og veitingastaðir og þeir hver öðrum skemmtilegri.

Þar getur þó orðið þröngt um mann og annan yfir sumartímann og því ráð að kíkja hingað utan þess tíma til að njóta til fulls. Og engin þörf að biðja um eitthvað sérstakt. Af yfir 20 börum sem við heimsóttum hér í borg og báðum um vín hússins fengum við aldrei yngra en sjö ára gamalt og í hvert einasta sinn vín frá héraðinu. Allra ódýrasta glasið á heilar 280 krónur. Þetta köllum við afbragðs þjónustu 🙂

Leave a Reply