Á vef Icelandair hefur lunga dagsins verið tilkynning þess efnis að þremur vélum félagsins hafi seinkað nokkuð. Sérstaklega seinkar áætluðu flugi frá Keflavík til Kaupmannahafnar og það um fjórar klukkustundir að minnsta kosti og kannski lengur þegar þetta er skrifað. Slík seinkun er næsta ábyggilega bótaskyld að einhverju leyti.
Þetta er ekki ósvipuð seinkun og fjölskylda ein varð fyrir hjá sama flugfélagi í lok árs 2012 og Fararheill fjallaði sérstaklega um. Ástæða þess að við tókum það fyrir var að Icelandair í því tilfelli hafnaði öllum bótakröfum á þeirri forsendu að um gallaðan varahlut hefði verið að ræða.
Það hefur líklega þaggað niður í flestum farþegum öðrum en þessari erlendu fjölskyldu sem hélt máli sínu til streitu og kærði til Flugmálastjórnar.
Skoðaðu þá grein okkar til að vita hvað sú fjögurra manna fjölskylda bar úr býtum fyrir þá þolinmæði sína og að taka orð Icelandair EKKI góð og gild.
Ekkert skal fullyrt um bótaábyrgð í þessu tilfelli enda liggur ekki ljóst fyrir hvers eðlis þessi seinkun er. En sjálfsagt er að leita réttar síns sé fólk ósátt.