Það eru engar fréttir að ritstjórn Fararheill undrast daginn út og inn hvers vegna almenningur á viðskipti við Úrval Útsýn Pálma Haraldssonar. Kannski er það rétt sem máltækið segir að þangað leitar klárinn sem hann er kvaldastur…

Smekklegt að eiga viðskipti við ítrekaðan svindlara og almennan skíthæl.

Hvað höfum við svona á móti Pálma greyinu kenndum við Harald kann einhver að spyrja. Nokkrar ástæður en veigamest sú staðreynd að sami Pálmi var höfuðpaur í að svindla og svína á íslenskum almenningi um áraraðir með verðsamráði á grænmeti og ávöxtum á þeim tíma þegar aðeins einn aðili réði lögum og lofum í innflutningi á ávöxtum og grænmeti.

Nú kann elskulegt fólk að benda á að Jesú litli hafi sagt að fyrirgefa beri slíku fólki og rétta hina kinnina. Víst er það til eftirbreytni en sonur Haralds notaði það tækifæri til að fiffa og fíflast áfram í landi og þjóð með svo ævintýralegum fjárhagslegum gjörningum að skattstjóri er búinn að klóra sig svo til blóðs í hausnum að Blóðbankinn hefur lagt blóðbankabílnum endanlega við hús skattstjóra í Garðabæ.

Að gamni slepptu má öllu hugsandi fólki vera ljóst að sá sem einu sinni svíkur og prettar með húrrandi árangri gerir það aftur og aftur og aftur og aftur. Vorum við búin að segja aftur?

Þetta má glöggt sjá ætli fólk til Tenerife með Úrval Útsýn. Flug og hótel með Úrval Útsýn vissulega nokkuð á pari við það sem aðrar innlendar ferðaskrifstofur eru að bjóða svona heilt yfir. En það er allt þetta litla og smáa sem er kjörið til að hirða feita peninga af lýðnum. Dæmi um það má sjá hér til hliðar.

Ef glöggt er skoðað má sjá að það kostar sex þúsund krónur að skottast 20 mínútur með fjóra einstaklinga til Los Cristianos á Tenerife og þar af tvö börn. Sama gjald til baka á flugvöllinn.

Þar gefur að líta aukamöguleika þeirra sem áhuga hafa að eyða tíma á Tenerife í sumar. Valmöguleikarnir eru þrír. Akstur til og frá flugvelli og forfallagjald.

Allir þeir sem til Tenerife hafa komið vita sem er að frá flugvellinum og inn í Los Cristianos eða Playa de las Americas tekur rétt rúmar 20 mínútur frá flugvellinum og vitaskuld svipað lengi til baka.

Fyrir sæti í rútu inn í bæ og út á flugvell aftur vill Úrval Útsýn fá litlar 12 þúsund krónur samtals fjölskyldu með tvö börn undir ellefu ára aldri. Sex þúsund íslenskar krónur hvora leið fyrir sig.

Vissulega er fólki skutlað alla leið á hótelið en þetta svæði er ekki New York. Það tekur engar 10 mínútur að rölta að hótelinu frá næstu strætóstoppistöð. Og það er mergurinn málsins. Með flugrútunni frá Tenerife Sur flugstöðinni og inn í bæina og sömu leið til baka þarf hver viðskiptavinur að greiða heilar 372 krónur miðað við gengi dagsins. Samtals fram og aftur 744 krónur. Nema auðvitað fólk kaupi sér svokallaðan bono-miða í flugstöðinni fyrirfram. Þá kostar hver túr með flugrútunni heilar 260 krónur eða 520 krónur fram og aftur.

Úrval Útsýn er því að heimta 100 prósentum hærra verð fyrir skutl frá flugvelli og inn í bæ en það kostar með flugrútunni sömu leið!!!

Það kallast urrandi okur á öllum tungumálum heims!