Ef ekki væri fyrir þá staðreynd að í Bretlandi er flugfélagið Primera Air talið íslenskt batterí væri alveg hreint ljómandi góð skemmtun að fylgjast með manni ársins árið 2007 gera feitt í buxur á þeim markaðnum.

Viðskiptamógúll ársins hjá Frjálsri Verslun en viðskiptavitið virðist ekki upp á marga fiska. Skjáskot

Andri Már Ingólfsson, helsti eigandi Primera Air, Heimsferða og fleiri fyrirtækja og auðvitað maður ársins hjá Frjálsri verslun, hefur aldeilis fengið á baukinn hjá þeim bresku að undanförnu. Flugfélagið fór nýlega  inn á breskan markað í fimmta gír með aðra hönd á stýri og hina út um gluggann og ætlaði að velgja öllum öðrum undir uggum með stórkostlegum fargjöldum vestur um haf til Bandaríkjanna. Íslenska bankaheilkennið gerir vart við sig að nýju.

En maður ársins hjá Frjálsri verslun þarf sennilega á námskeið hjá endurmenntun Háskóla Íslands. Námskeiðið Kapp er best með forsjá ætti þar að vera fyrsta skráning.

Orðspor Primera Air hefur beðið feitan hnekki í Bretlandi og það löngu áður en fyrsta rellan hefur sig til flugs. Aðallega sökum þess að eftir stórar yfirlýsingar í vetur hefur áætlun Primera Air frá Bretlandi tekið miklum breytingum á augabragði. Flugfélagið hefur hætt við nánast allar ferðir sínar frá Birmingham til Bandaríkjanna. Að sama skapi hefur Primera Air fækkað flugferðum félagsins vestur um haf frá Stanstead flugvellinum við London.

Litla smekklega græðgin hjá Primera Air. Andri Már klárlega maður ársins aftur hjá Frjálsri verslun. Skjáskot

Doohhh. Fór eitthvað fram hjá Andra Má við skipulagningu að Birmingham gæti ekki trekkt svo mikið sem gauksklukku og þaðan af síður eru íbúar borgarinnar mikið fyrir ferðalög samanber öll þau flugfélög sem gefist hafa upp á ferðum þaðan? Það þurfti aðeins smá gúggl til að vita það.

Nógu slæmt þó fyrir þjálfara liðs úr annarri deild að monta sig af stórkostlegheitum þegar liðið kemst upp í efstu deild. Öllu verra þegar selja á flug á góðu verði en græða meira en George Soros á öllu öðru. Eins og til dæmis að heimta 5.500 krónur fyrir staka kjötmáltíð á leiðinni yfir hafið!!!

Jamm, maður ársins vill að farþegar sínir greiði sama verð fyrir örskammt af upphituðum þreyttum kjötrétti í plastbakka með plasthnífapörum um borð og þú borgar fyrir þríréttað með víni á öllum almennilegum venjulegum veitingastöðum við Miðjarðarhafið….

Á móti kemur að Bretinn getur pantað sér tiltekið sæti um borð á LÆGRA verði en við hér á Íslandi sem komum fótum undir þennan slefhaus sem Andri Már Ingólfsson virðist vera.

PS: Námskeiðið Kapp er best með forsjá hefst þann 6. mars í sal 9 í aðalbyggingu Háskóla Íslands.