Vilji einhver súperpríma dæmi um að fara yfir lækjarsprænu eftir vatni kemur ferðaskrifstofan Heimsferðir sterk inn. Sú býður nú fjölda tilboða á pakkaferðum til Almeríu næsta sumarið en þar liggur úldinn hundur undir steini.

Margt gott við héraðið Almeríu á Spáni en Roquetas de Mar ekki partur af því. Öllu gáfulegra að njóta lífsins í hinni merkilegu Malaga ef þú spyrð okkur 😉

Kíktu á þetta hér. Þar má sjá úrval pakkaferða Heimsferða til strandbæjarins Roquetas de Mar í Almeríuhéraði. Sem er gott og blessað enda skítsæmilegur áfangastaður ef fólk lítur framhjá rusli og óhreinindum um allar trissur.

En hvers vegna í ósköpunum að auglýsa ferðir til hins yfirborðskennda strandstaðar Roquetas de Mar þegar flugið sjálft er til Malaga á Costa del Sol? Borgar sem er bara þúsundfalt skemmtilegri en Roquetas de Mar og engin þörf á að þvælast í fimm, sex klukkustundir í rútu eða bíl?

Jamms, þú last þetta rétt. Allir þeir sem kaupa „Almeríuferð“ Heimsferða þurfa að skottast í bíl eða rútu í fjórar til fimm stundir til og frá þeim gististöðum sem þú bókar og það kostar feitt aukalega umfram uppgefið verð. Þetta er svona svipað rugl og að auglýsa ferðir til London en það er lent í Manchester.

Þó Roquetas de Mar sé ekki 100 prósent ömurlegur staður þá fer hann nálægt því marki og ekkert þar á neitt skylt við Spán, Spánverja eða spænskan kúltúr. Þvert á móti er hér varla þverfótað fyrir plastrusli og viðbjóðslegu þrælahaldi í fimm mínútna fjarlægð frá sæmilegum ströndunum. Fyrir utan auðvitað fólk af öllu öðru þjóðerni en spænsku.

En hvers vegna er flogið til Malaga þegar áfangastaðurinn er milljón kílómetra í burtu? Hvers vegna sérstaklega með það í huga að Malaga sjálf er aldeilis stórkostlegur áfangastaður hvort sem þú elskar smá úrval í verslun eða vilt bara slefa í sandinn undir sólinni?

Týpískt rugl vitlausra bankamanna sem eiga nú og reka ferðaskrifstofuna Heimsferðir og vita ekkert hvað þeir eru að gera…