Neyðin kennir naktri konu að spinna og sömuleiðis kennir veik króna íslenskum ferðalöngum að leita allra leiða á dýrum áfangastöðum. 

Fararheill getur vottað að húsbátagisting í Hollandi er skemmtilega ferskt ævintýri.
Fararheill getur vottað að húsbátagisting í Hollandi er skemmtilega ferskt ævintýri.

Holland er eitt þeirra landa í Evrópu þar sem krónugreyið er ekki upp á marga fiska þrátt fyrir uppgang um hríð og bregður reyndar mörgum við því sæmileg gisting í helstu borgum landsins finnst nánast ekki undir 25 þúsund krónur per nótt. Sem sagt íslensk hótelverð í gangi hér.

Í Amsterdam sérstaklega er töluvert vandamál að finna sæmileg hótel á viðráðanlegu verði en þá er þjóðráð að skoða gistingu í húsbátum í einhverjum af fjölmörgum skurðum borgarinnar.

Víst hljómar það kannski ekki vænlega að troða fjölskyldu í bátskrifli en reyndin er að velflestir kunna vel að meta slíkt auk þess sem slík upplifun gleymist síður en dvöl á enn einu hótelinu.

Fararheill hefur prófað tvær nætur í slíkum bát og hefur yfir engu að kvarta þó vissulega taki stundarkorn að taka það inn að fólk hafi heilan húsbát til umráða.

Í Hollandi öllu eru alls tíu þúsund húsbátar og fjórðungur þeirra liggur við kajann í einhverjum af mörgum skurðum Amsterdam. Þeir eru af ýmsum gerðum og misdýrir en eiga það sameiginlegt flestir að dvöl í þeim er síst dýrari, og oft ódýrari, en dvöl á hótelum.

Ýmsir halda að það sé galli hversu auðvelt er að brjótast inn í slíka báta en það er hreint ekki auðvelt þegar á hólminn er komið. Trúið okkur, við prófuðum að finna leið inn í bát þann sem ritstjórn leigði sér og gáfumst upp. Þá er líka vakt við vinsælli og stærri skurðina og nánast alltaf fólk á ferli alls staðar.

Kíktu á hótelvef okkar hér að neðan. Eins og lesendur vita finnast þar ekki aðeins hótel og gistihús heldur alls kyns gistimöguleikar og þar á meðal húsbátar. Um hundrað húsbáta að velja í Amsterdam einni þegar þetta er skrifað. Muna bara að þrengja leitina á stikunni til vinstri og einskorða leit við húsbáta 🙂