Heimsmeistaramót íslenska hestsins hafa gegnum árið þótt merkismót og mikið í þau mót lagt. Fullyrða má hins vegar að mótið árið 2013 mun slá öllum öðrum slíkum mótum við.

Hvers vegna skyldi það nú vera? Í fyrsta lagi fer mótið fyrsta sinni fram í stórborg og það í Berlín af öllum borgum en sú er án alls vafa ein sú allra skemmtilegasta heimsóknar í Evrópu allri. Þar er verðlag undir því sem gerist í öðrum stærri borgum álfunnar og sé hægt að segja að saga sé við hvert fótmál á það við um Berlín og margar götur hennar.

Sú staðreynd að mótið fer fram í borg en ekki úti á landi eins og raunin hefur verið undanfarin ár þýðir einfaldlega að áhugafólk getur haft meira fyrir stafni en fylgjast með sýningum eða keppninni sjálfri. Á mannamáli getur konan, skyldi hún hafa minni áhuga á hestum en makinn, haldið í verslunartúr meðan karlálkan glápir úr sér augun á mótinu.

Í öðru lagi þýðir þessi staðsetning að öllum líkindum að mun fleiri áhorfendur munu koma á mótið en ella. Nóg er við að hafa í Berlín en ekki á hverjum degi sem íbúar komast í tæri við íslenska hesta úti á hlaði. Og sá íslenski er afar vinsæll í Þýskalandi.

Í þriðja lagi þá er ekkert vesen að koma sér á staðinn frá klakanum í norðri. Héðan eru í dag beinar ferðir til Berlínar bæði hjá Icelandair og Iceland Express og engin ástæða til annars en svo verði áfram enda staðurinn vinsæll. Það er því hægt að komast þráðbeint á Heimsmeistaramótið á fimm klukkustundum eða svo frá Keflavík. Sem er sýnu betra en þvælast um sveitir á bílaleigubíl til að finna viðburðinn.

Að síðustu ætla mótshaldarar ekki að spara neitt við undirbúning. Þvert á móti er verið að byggja afar glæsilegt mótssvæði nú þegar og þar verður öll aðstaða fyrir hesta og menn fyrirtak.