Ók. Við vitum flest að hitastig í Karíbahafinu fer yfirleitt aldrei undir himneskt fyrir bleiknefja frá ballarhafi í norðri. Sandurinn á ströndum eyjanna hér kornóttari en gerist og gengur sem þýðir enn ljúfara spásserí, heimamenn brosa og gleðjast eins og annað sé lögbrot og ekki hvað síst er hér engin eyja með eyjum nema bjóða upp á súpergott heimabruggað romm. 

Sól, sandur og suðupunktur skemmtana og stuðs.

Þá er fátt eitt nefnt sem heillar við þær fjölmörgu eyjur sem lita þennan heimshluta. Verðlag brandari, sjórinn ekki bara heitur og ljúfur heldur líka tær og kjaftfullur af forvitnilegum skepnum, náttúrufegurð á heimsmælikvarða og þrátt fyrir bág kjör kann fólk almennt að skemmta sér sirka sjötíufalt betur við hér í grennd við Norðurskautið.

En það er fleira sem gerir ferðalög hingað merkilegri en ella. Hér fimm ástæður (aðrar en þessar hundrað venjulegu, hvers vegna karabíska verðskuldar heimsókn og það EKKI á skemmtiferðaskipi.)

  • DAGUR HEILAGS PATREKS  –  Allir ferðaelskendur þekkja þessa miklu írsku hátíð sem haldin er með pompi og prakt á ólíklegustu stöðum um miðjan mars ár hvert. En þó heilagur Patrekur sé hylltur víða um heim og þá aðallega með drykkju og látum, eru aðeins tveir staðir á jarðarkringlunni þar sem þessi dagur er opinber frídagur. Það er annars vegar á Írlandi auðvitað og hins vegar á smáeynni Montserrat í karabíska hafinu. Montserrat litlu stærri en títuprjónshaus á korti og reyndar líka í návígi og sökum skorts á gistimöguleikum kostar morð fjár að eyða hér nótt á sæmilegu hóteli. Það þó tómt hjóm við að dansa glöð og reyf á götum þessarar Surtseyjar Karíbahafs í hópi fólks sem margir hverjir rekja ættir sínar þráðbeint til Írlands. Sem skýrir hvers vegna þessi örlitla eyja heldur svo mjög upp á dag Patreks 🙂
  • KRYDD OG KONUNGSRÍKI JURTANNA  –  Hún ekkert mikið stærri að flatarmáli en Montserrat en öllu þekktari er Grenada þó. Hvers vegna kannt þú að spyrja? Jú, fyrir utan strendur á heimsmælikvarða plús þokkalega nálægð við einhver fallegustu lönd Suður-Ameríku er gróðursæld óvíða meiri í heiminum. Hér má finna jurtir og tré vaxa óáreitt sem annars staðar hafa verið týndar eða hoggin svo grimmilega að stofninn nær sér aldrei. Gott dæmi um þetta finnst í millahverfinu Chelsea í London af öllum stöðum þegar hin fræga Blómasýning fer þar fram árlega. Þar hefur enginn staður fengið jafn mörg gullverðlaun fyrir jurtir og blóm eins og Grenada 🙂
  • KAFFI OG KÓSÍHEIT  –  Allmargir Íslendingar hafa heimsótt Jamaíka gegnum tíðina og vita sem er að fátt er þar til að kvarta yfir. Töluvert fáir hafa þó þorað inn í höfuðborgina Kingston en þar má meðal annars finna markaði þar sem þú færð Blue Mountain kaffi í kílóavís fyrir klink og ingenting. Hvað er svo Blue Mountain kaffi? Jú, það þykir ein allra besta kaffitegund heims og hana aðeins hægt að rækta á afar takmörkuðum bletti í hinum íðilfögru Blue Mountain fjöllum heimamanna. Ætlir þú að fá þér bolla af Blue Mountain í vestrænum löndum kostar kílóið hátt í tíu þúsund krónur en á Coronation markaðnum í Kingston fæst kíló af sama kaffi á rúmar þrjú hundruð krónur 🙂
  • NÁTTÚRULÝSING Í TÓBAGÓ  –  Trinidad og Tóbago er formlegt heiti tveggja systraeyja langt til suðurs í Karíbahafi. Báðar þekktar fyrir gott djamm og enn betra djúserí ef sá gállinn er á fólki. En milli þess sem þú slefar ofan í næsta kokteil á mögnuðum ströndunum er ráð að leigja eins og einn kajak að næturlagi og láta þig fljóta um lygnar ár Tóbagó. Hvers vegna að næturlagi? Jú, það er aðeins þá sem þú getur vitnað eitt af náttúrlegum undrum veraldar með berum augum. Fróðir kalla það dinoflagelleates en það er heiti lífvera sem gefa frá sér náttúrulegan bjarma sem lýsa merkilega langar leiðir. Lýsingin ekki í boði Orkuveitu Tóbago heldur alls náttúruleg og að vitna um allar trissur undir koldimmri karabískri nótt er upplifun sem fylgir þér ævina á enda 🙂
  • GLEÐIGANGAN Í GRENADINE  –  Það er almennt ekki ýkja ráðlegt að opinbera samkynhneigð á mörgum stöðum í Karíbahafi. Því geta fylgt barsmíðar og leiðindi á tilteknum stöðum. Ekki þó á eyjum Grenadine eða Grenadínum eins og háttvirtir íslenskir fræðingar hafa nefnt staðinn eftir fupl og fuður. Grenadínur samansafn margra lítilla eyja en á einni þeirra, Bequia, fer fram skemmtilegasta gleðiganga Karíbahafs: Bequia Mount Gay Music Fest. Ef þú efast er óhætt að ímynda sér fölskvalausa gleði samkynhneigðra almennt plús ævintýralega gleði eyjaskeggja Grenadines almennt. Útkoman er súpergott partí 🙂

Þú ert ekkert að verða neitt yngri. Drífa sig 🙂 Og gistingu færðu á allra besta verði á fimmföldum gullverðlaunahafa á World Travel Awards hér að neðan